रूपन्देही । लुम्बिनी प्रदेश सरकारलाई समर्थन नगर्ने पार्टीको केन्द्रीय निर्णय प्रदेश सांसदहरूले नमान्ने भएका छन्। एमाले प्रमुख सचेतक यमुना रोकाका अनुसार सांसद भण्डारीलाल अहिर र आदेश अग्रवाल सरकारलाई समर्थन गर्न सहमत हुँदै एमाले कार्यालयमा पुगेका छन्।
मुख्यमन्त्री चेतनारायण आचार्यले प्रदेशसभाबाट विश्वासको मत लिने तयारी गरिरहँदा सरकारको पक्षमा रहेका दलका सांसदहरू एमाले संसदीय कार्यालयमा भेला भएका छन्। एमालेसहित नेपाली कम्युनिष्ट पार्टी, राष्ट्रिय जनमोर्चालगायत दलका सांसदहरू सामूहिक रूपमा प्रदेशसभा बैठकमा जाने तयारीमा छन्।
एमाले कार्यालयमा भएको छलफलमा मुख्यमन्त्री आचार्यको पक्षमा मतदान गर्ने विषयमा सांसदहरूबीच सहमति भएको बताइएको छ। सांसदहरूको उपस्थितिसँगै मुख्यमन्त्री आचार्यको पक्षमा आवश्यक बहुमत जुटेको दाबी गरिएको छ।
नेपाली कांग्रेसले सरकारलाई दिएको समर्थन फिर्ता लिएपछि संवैधानिक व्यवस्थाअनुसार मुख्यमन्त्री आचार्यले विश्वासको मत लिन लागेका हुन्। सरकारलाई विश्वासको मत दिलाउन एमालेसहित सरकारमा सहभागी दलहरूबीच यसअघि नै आवश्यक समन्वय गरिएको थियो।
प्रकाशित मिति: सोमबार, भदौ १, २०८३
