काठमाडौं । नेकपा एमालेका अध्यक्ष केपी शर्मा ओलीले विमानस्थलमा आफूलाई कडा चेकजाँच गरिएको भन्दै आपत्ति जनाएका छन्।
इलाम पुगेका ओलीले लोकतान्त्रिक आदिवासी जनजाति महासंघको बैठकलाई सम्बोधन गर्दै आफूलाई अपराधीलाई जस्तो व्यवहार गरिएको गुनासो गरेका हुन्।
विमानस्थलमा मेटल डिटेक्टर प्रयोग गरेर पटक–पटक शरीर खानतलासी गरिएको भन्दै ओलीले रोष प्रकट गरे। उनले एक ठाउँमा जाँच गरिसकेपछि पुनः अर्को स्थानमा समेत जाँच गरिएको भन्दै असन्तुष्टि जनाए।
ओलीले आफू कुनै आपराधिक गतिविधिमा संलग्न व्यक्ति नभएको उल्लेख गर्दै विमानस्थलमा पटक–पटक शरीर खानतलासी लिनुको कारणबारे प्रश्न गरे।
उनले विमानस्थलमा कडाइका साथ जाँच गरिए पनि सीमा नाकाबाट हुने तस्करी नियन्त्रणमा प्रभावकारी काम हुन नसकेको आरोप लगाए। ‘ट्रकका ट्रक तस्करी सीमाबाट भएको हुन्छ, एयरपोर्टमा चाहिँ मेरो शरीरमा डिटेक्टर लगाउँछन्,’ ओलीले भने।
विमानस्थलमा गरिएको चेकिङप्रति ओलीले सार्वजनिक रूपमा दोस्रोपटक गुनासो गरेका हुन्। यसअघि गत माघमा पनि उनले आफूलाई सुन तस्करलाई जस्तो व्यवहार गरिएको भन्दै आपत्ति जनाएका थिए।
प्रकाशित मिति: आइतबार, साउन ३१, २०८३
