बोगोता । कोलम्बियाका नवनिर्वाचित राष्ट्रपति अबेलार्डो डे ला एस्प्रिएल्लाले अमेरिकी राष्ट्रपति डोनाल्ड ट्रम्पसँगको फोनवार्तामा कोलम्बियाली सामानमाथि लगाइएको अतिरिक्त भन्सार महसुल (ट्यारिफ) अस्थायी रूपमा हटाउन आग्रह गरेका छन्।
कोलम्बियामा सोमबार गएको ७ दशमलव ४ म्याग्निच्युडको शक्तिशाली भूकम्पमा परी कम्तीमा २९४ जनाको मृत्यु भएको छ। भूकम्पका कारण देशभर दशौँ हजार भवनमा क्षति पुगेको छ भने पुनर्निर्माणका लागि करिब ६ दशमलव ४ अर्ब अमेरिकी डलर आवश्यक पर्ने अनुमान गरिएको छ।
अमेरिकाले जुलाईको अन्त्यमा अधिकांश कोलम्बियाली सामानमाथिको ट्यारिफ १० प्रतिशतबाट बढाएर १२ दशमलव ५ प्रतिशत पुर्याएको थियो। कफी र तेललगायत केही वस्तुलाई भने ट्यारिफबाट छुट दिइएको छ।
कोलम्बियाको सबैभन्दा ठूलो निर्यात बजार अमेरिका भएकाले नयाँ ट्यारिफले भूकम्पपछि पुनर्निर्माणमा जुटिरहेका व्यवसायमा थप आर्थिक दबाब पार्न सक्ने भन्दै राष्ट्रपति एस्प्रिएल्लाले ट्यारिफ अस्थायी रूपमा हटाउन आग्रह गरेका हुन्।
एस्प्रिएल्ला र ट्रम्पबीच करिब १० मिनेट फोनवार्ता भएको थियो। एस्प्रिएल्लाले वार्ता मैत्रीपूर्ण र सौहार्दपूर्ण रहेको बताएका छन्। उनले भूकम्पपछि देशले ठूलो आर्थिक चुनौती सामना गरिरहेको भन्दै पुनर्निर्माणका लागि ट्यारिफ हटाउन आवश्यक रहेको बताएका छन्।
प्रकाशित मिति: आइतबार, साउन ३१, २०८३
