काठमाडौं । इटालियन क्लब इन्टर मिलानले इंग्लिस विंगर जेड स्पेन्सलाई टोटनहमबाट भित्र्याएको छ।
इन्टरले शनिबार स्पेन्ससँग सन् २०३१ सम्मको सम्झौता भएको जनाएको छ। क्लबले सम्झौता रकम खुलाएको छैन। तर, इंग्लिस सञ्चारमाध्यमका अनुसार इन्टरले उनलाई ३० मिलियन पाउन्डमा अनुबन्ध गरेको हो।
इन्टरले विज्ञप्तिमार्फत स्पेन्सलाई क्लबमा भित्र्याएको जानकारी दिँदै उनीसँग २०३१ सम्मको सम्झौता भएको जनाएको छ।
स्पेन्स चार वर्षअघि टोटनहम पुगेका थिए। उनले टोटनहमबाट ८५ खेल खेलेका थिए। यस अवधिमा उनले एकपटक युरोपा लिगको उपाधिसमेत जितेका थिए।
टोटनहममा रहँदा स्पेन्स स्टेड रेनाइस, लिड्स युनाइटेड र जेनोआमा लोनमा समेत खेलेका थिए।
इंग्ल्यान्डको राष्ट्रिय टोलीका सदस्यसमेत रहेका स्पेन्स सन् २०२६ मा सम्पन्न फिफा विश्वकपमा पनि टोलीमा समावेश भएका थिए।
प्रकाशित मिति: आइतबार, साउन ३१, २०८३
