भारतको उत्तराखण्डस्थित चमोली जिल्लाको पिपलकोटीमा निर्माणाधीन सुरुङमा पानी र पहिरोको लेदो पस्दा सात जना मजदुरको मृत्यु भएको छ।
टीएचडीसीको निर्माणाधीन सुरुङमा दुर्घटना हुँदा त्यहाँ करिब २० देखि २२ जना मजदुर काम गरिरहेका थिए। सुरुङमा पानी र लेदो पसेपछि मजदुरहरू फसेका थिए।
उद्धार अभियानका क्रममा सुरुङबाट १९ जना मजदुरलाई बाहिर निकालेर गोपेश्वर जिल्ला अस्पताल पुर्याइएको थियो। अस्पतालमा चिकित्सकहरूले तीमध्ये सात जनालाई मृत घोषित गरेका छन्।
उद्धार गरिएका बाँकी मजदुरमध्ये १० जनालाई अस्पतालमा भर्ना गरिएको छ। उनीहरूको अवस्था तुलनात्मक रूपमा स्थिर रहेको चिकित्सक डा. आयुषले बताएका छन्। एक जना गम्भीर घाइते युवकलाई थप उपचारका लागि श्रीनगरस्थित बेस अस्पतालमा रेफर गरिएको छ।
राष्ट्रिय विपद् प्रतिकार्य बल (एनडीआरएफ) र राज्य विपद् प्रतिकार्य बल (एसडीआरएफ) का टोलीले सुरुङभित्र लगातार राहत तथा उद्धार कार्य जारी राखेका छन्।
एनडीआरएफका अधिकारी अमृत लाल मीणाका अनुसार सुरुङभित्र ठूलो मात्रामा पानी भरिएकाले उद्धार कार्यमा कठिनाइ भइरहेको छ। सुरुङमा फसेका अन्य मजदुरको खोजी तथा उद्धारका लागि टोलीले प्रयास जारी राखेको छ।
प्रकाशित मिति: शुक्रबार, साउन २९, २०८३
