काठमाडौं । अमेरिकी सेनाले ‘यूएसएस थियोडोर रुजवेल्ट’ एयरक्राफ्ट क्यारियरसहित थप सैन्य शक्ति पश्चिम एसियातर्फ पठाउन थालेपछि अक्टोबरको अन्त्यसम्म क्षेत्रमा तीनवटा अमेरिकी एयरक्राफ्ट क्यारियर हुन सक्ने देखिएको छ ।
अमेरिकी अधिकारीहरूलाई उद्धृत गर्दै अन्तर्राष्ट्रिय सञ्चारमाध्यमहरूले जनाएअनुसार ‘यूएसएस थियोडोर रुजवेल्ट’सहित करिब ९ हजार अमेरिकी सैनिक बोकेका पानीजहाजहरू पश्चिम एसियातर्फ अघि बढेका छन् । यसअघि नै ‘यूएसएस जर्ज एचडब्ल्यू बुश’ र ‘यूएसएस जर्ज वासिङ्टन’ क्षेत्रमा रहेका छन् ।
यो तैनाथी अमेरिकाले इरानमाथि थप सैन्य कारबाही गर्न सक्ने सम्भावना व्यक्त भइरहेका बेला भएको हो । राष्ट्रपति डोनाल्ड ट्रम्पले नोभेम्बर ३ मा हुने अमेरिकी मध्यावधि निर्वाचनपछि इरानमाथि पुनः आक्रमण गर्न सक्ने संकेत दिएका छन् ।
अमेरिकी रक्षामन्त्री पिट हेगसेथले यसअघि सम्झौता हुन नसके इरानविरुद्ध सैन्य कारबाही पुनः सुरु गर्न अमेरिकी सेना तयार रहेको बताएका थिए ।
इरानको सातदिने युद्धविराम प्रस्ताव अस्वीकार
इरानले सात दिनभित्र होर्मुज जलडमरू खुला गर्ने र अमेरिकासँग परमाणु कार्यक्रमबारे वार्ता पुनः सुरु गर्ने प्रस्ताव अघि सारेको थियो । त्यसका बदलामा अमेरिकी नाकाबन्दी हटाउने, रोक्का राखिएका सम्पत्ति फुकुवा गर्ने तथा इरानी तेलमाथिका प्रतिबन्धमा राहत दिने विषय प्रस्तावमा समेटिएको थियो ।
अमेरिकी सञ्चारमाध्यमहरूले ट्रम्पले उक्त प्रस्ताव अस्वीकार गरेको जनाएका छन् । ट्रम्पले प्रस्ताव आफूका लागि पर्याप्त नभएको बताएका थिए ।
इरानका विदेशमन्त्री अब्बास अरागचीका अनुसार अमेरिकी पक्षले प्रस्ताव स्वीकार गरेमा प्रारम्भिक चारदेखि पाँच दिनमा आवश्यक प्रक्रिया पूरा गरी छैटौँ दिनमा होर्मुज जलडमरू खुला गर्ने र सातौँ दिनमा परमाणु कार्यक्रमबारे वार्ता सुरु गर्ने योजना थियो ।
इरानमाथि पुनः आक्रमणको सम्भावना
ट्रम्पले मध्यावधि निर्वाचनपछि इरानमाथिको बमबारी पुनः बढ्न सक्ने सम्भावना रहेको बताएका छन् । यद्यपि उनले वार्ताबाट समाधानको सम्भावना पनि खुला राखेका छन् ।
अमेरिका र इजरायलले फेब्रुअरी २८ मा इरानविरुद्ध सैन्य कारबाही सुरु गरेपछि जारी द्वन्द्वमा इरानले पनि इजरायल तथा खाडी क्षेत्रमा रहेका अमेरिकी सैन्य आधारहरूमा आक्रमण गर्दै आएको छ । अमेरिकाले इरानको आणविक क्षमतालाई कमजोर पार्नु आफ्नो प्रमुख उद्देश्य रहेको बताउँदै आएको छ भने इरानले आफ्नो आणविक कार्यक्रम शान्तिपूर्ण रहेको दाबी गर्दै आएको छ ।
अमेरिकी सैन्य शक्ति थपिँदै जाँदा पश्चिम एसियामा तनाव अझ बढ्ने संकेत देखिएको छ । तीनवटा एयरक्राफ्ट क्यारियर समूह एकै क्षेत्रमा पुग्दा अमेरिकी नौसैनिक तथा हवाई क्षमताको उपस्थितिसमेत उल्लेख्य रूपमा बढ्नेछ ।
प्रकाशित मिति: शुक्रबार, असोज १६, २०८३
