काठमाडौं । बेलायतको रोयल एयर फोर्स (आरएएफ) फेयरफोर्ड वायुसेना अखडानजिक भएको संदिग्ध घटनामा इरानको संलग्नता रहेको ‘बलियो संकेत’ भेटिएको बेलायती अधिकारीहरूले बताएका छन्। घटनाको अनुसन्धान भने आतंकवादविरोधी प्रहरीले जारी राखेको छ।
आइतबार फेयरफोर्डनजिकैको वेल्फोर्ड क्षेत्रमा तीनवटा भ्यानसहित संदिग्ध गतिविधि देखिएपछि प्रहरीले पाँच बेलायती नागरिकलाई पक्राउ गरेको थियो। २३ देखि २५ वर्ष उमेर समूहका उनीहरूलाई विस्फोटकसम्बन्धी अपराध तथा आतंकवादी गतिविधिको तयारी गरेको आशंकामा नियन्त्रणमा लिइएको थियो।
पक्राउ परेका पाँचै जनालाई सोमबार कडा सर्तसहित धरौटीमा रिहा गरिएको छ। प्रहरीले उनीहरू अनुसन्धानको दायरामै रहेको र धरौटीमा रिहा हुनु अनुसन्धान समाप्त भएको अर्थ नलाग्ने स्पष्ट पारेको छ।
प्रहरीले संदिग्धहरूले प्रयोग गरेका तीनवटा भ्यानको विस्तृत जाँच गरेको थियो। भ्यानबाट पेट्रोल फेला परे पनि कुनै विस्फोटक उपकरण नभेटिएको अनुसन्धानकर्ताले बताएका छन्। घटनाको उद्देश्य र पक्राउ परेकाहरूको सम्भावित विदेशी सम्बन्धबारे अनुसन्धान भइरहेको छ।
आरएएफ फेयरफोर्ड अमेरिकी सेनाले पनि प्रयोग गर्दै आएको सैन्य अखडा हो। पछिल्लो समय यो अखडा इरानविरुद्ध अमेरिकी सैन्य कारबाहीका लागि प्रयोग भएको थियो। यही कारण घटनामा इरानी सम्बन्धबारे अनुसन्धान भइरहेको हो।
बेलायती पक्षले इरानको संलग्नताको ‘बलियो संकेत’ रहेको बताए पनि घटनामा इरानको ठोस भूमिका के थियो भन्ने विस्तृत विवरण सार्वजनिक गरिएको छैन। बेलायत र अमेरिकाका अधिकारीहरू घटनाको अनुसन्धानमा समन्वय गरिरहेका छन्।
यसैबीच, इरानले घटनामा आफ्नो संलग्नता अस्वीकार गरेको छ। लन्डनस्थित इरानी दूतावासले आफूलाई घटनासँग जोड्ने दाबीको खण्डन गर्दै त्यस्ता आरोपलाई निराधार भनेको छ।
पक्राउ परेकामध्ये एकजनाले घटनाभन्दा करिब एक घण्टाअघि आफैं प्रहरीको आपत्कालीन नम्बरमा फोन गरेको विवरणसमेत सार्वजनिक भएको छ। यसले घटनाको उद्देश्यबारे अनुसन्धानलाई थप जटिल बनाएको छ। अधिकारीहरूले सम्भावित आतंकवादी गतिविधि, विदेशी राज्यसँगको सम्बन्धलगायत विभिन्न कोणबाट अनुसन्धान गरिरहेका छन्।
अमेरिकी राष्ट्रपति डोनाल्ड ट्रम्प र विदेशमन्त्री मार्को रुबियोले पनि घटनामा विदेशी पक्षको सम्भावित संलग्नताबारे चासो व्यक्त गरेका छन्। यद्यपि, उनीहरूले सार्वजनिक रूपमा विस्तृत प्रमाण प्रस्तुत गरेका छैनन्।
प्रकाशित मिति: बिहीबार, असोज १५, २०८३
-1790834313.jpg)
