काठमाडौं । पाकिस्तान एसियन गेम्स पुरुष क्रिकेटको फाइनलमा प्रवेश गरेको छ ।
बिहीबार भएको पहिलो सेमिफाइनलमा बंगलादेशलाई ६ विकेटले पराजित गर्दै पाकिस्तानले स्वर्ण पदकको सम्भावना कायम राखेको हो ।
वर्षाका कारण मैदान भिजेपछि खेल ढिलो सुरु भएको थियो । त्यसपछि खेल १३ ओभरमा छोट्याइएको थियो ।
बंगलादेशले दिएको ११२ रनको लक्ष्य पाकिस्तानले ११.३ ओभरमा ४ विकेट गुमाएर पूरा गर्यो । अब्दुल समद ३० रनमा तथा हसन नवाज २७ रनमा अविजित रहे ।
बंगलादेशका महेदी हसन, नसुम अहमद, मुस्तफिजुर रहमान र रिशाद होसेनले समान १ विकेट लिए ।
त्यसअघि टस हारेर पहिले ब्याटिङ गरेको बंगलादेशले १३ ओभरमा ७ विकेट गुमाएर १११ रन बनाएको थियो । तोहिद रिदोएले सर्वाधिक ४२ रन बनाए । सेफ हसनले १९ तथा मोसदेक हुसेनले ११ रन जोडे ।
पाकिस्तानले अब स्वर्ण पदकका लागि भारत र श्रीलंकाबीचको दोस्रो सेमिफाइनलको विजेतासँग खेल्नेछ ।
पराजित बंगलादेशले कांस्य पदकका लागि सोही खेलको पराजित टोलीसँग प्रतिस्पर्धा गर्नेछ।
प्रकाशित मिति: बिहीबार, असोज १५, २०८३
-1790834313.jpg)
