२७ माघ, काठमाडौँ । उच्च अदालतमा भएको न्यायाधीश नियुक्तीको विरोधमा प्रदेश नम्बर २ बाट प्रतिनिधित्व गर्ने करिब ३ सय कानुन व्यवसायीले नेपाल बारको सदस्यबाट बिहीबार सामुहिक राजीनामा दिएका छन् । ती कानुन व्यवसायीले बारका अध्यक्ष शेर बहादुर केसीलाई राजीनामा बुझाएका हुन् । न्यायाधीश नियुक्तिका विषयमा नेपाल बारले आन्दोलन गरेपनि सर्वोच्च अदालतका प्रतिनिधिबीच सहमति गरेर धोका दिएको भन्दै सामुहिक राजीनामा दिएको उनीहरुले बताएका छन् । यद्यपी, राजीनामा भने आधिकारीक रुपमा स्वीकृत नभएको बारका महासचिव खम्ब बहादुर खातीले जानकारी दिनुभयो ।
उनीहरुको राजीनामा सम्बन्धमा अन्तिम निर्णय गर्न बारले सर्वोच्चका पुर्व न्यायाधीश समेत रहेका वरिष्ठ अधिवक्ता कमलनारायण दासको नेतृत्वमा ११ सदस्यीय वार्ता टोली गठन गरेको खातीले बताउनुभयो । टोलीले आन्दोलनमा उत्रिएका कानुन व्यवसायीसँग आवश्यक छलफल गरि नेपाल बारलाई सुझाव दिनेछ । यसैबीच सामुहिक राजीनामा लगत्तै बसेको न्यायाधीश नियुक्ती सघर्ष समितिको बैठकले नेपाल बारको लिखित प्रतिबद्धता नआए सम्म आफ्नो अडान कायम राख्ने निर्णय गरेको छ ।
अधिवक्ता सुधीर कर्ण संयोजक रहेको संघर्ष समितिको बिहीबार बैठकले आन्दोलनका बिषयमा बारले यसअघि पनि धोका दिएकाले लिखित प्रतिबद्धता माग्ने निर्णय गरेको हो । उच्च अदालतमा गरिएको न्यायधीश नियुक्ति समावेशी समानुपातिक सिद्धान्तका आधारमा नभएको भन्दै नेपाल बारले अघिल्लो साता मुलुकभर बहसर पैरवी बहिस्कार गरेको थियो । महान्यायाधीवक्ता रमण कुमार श्रेष्ठको पहलमा सर्वोच्च अदालतका प्रतिनिधसँग भएको छलफलपछि बारले आन्दोलनका कार्यक्रममा फिर्ता लिएपनि प्रदेश नम्बर २ बाट प्रतिनिधित्व गर्ने कानुन व्यवसायीले भने विरोध जारी राखेका थिए । सामुहिक राजीनामा दिनुअघि कानुन व्यवसायीले राजधानीको रामशाहपथ स्थित नेपाल बारको प्राङ्गणमा आज ब्यानर सहित प्रदर्शन गरेका थिए ।
प्रकाशित मिति: बुधबार, माघ २६, २०७३
