काठमाडौं । एसियाली खेलकुदअन्तर्गत टेनिसको महिला डबल्समा नेपाल पहिलो चरणबाटै बाहिरिएको छ।
नागोया सिटी हिगाशियामा पार्क टेनिस सेन्टरमा सोमबार भएको खेलमा शिभाली गुरुङ र स्वस्तिका विष्टको जोडी जापानका मोमोको कोबोरी र अयानो शिमिजुको जोडीसँग २–० को सोझो सेटमा पराजित भयो।
नेपाली जोडीले दुवै सेट ६–० ले गुमायो।
यसअघि मिक्स्ड डबल्समा पनि शिभाली र प्रदीप खड्काको जोडी जापानका शुको ओयामा र युसुके कुसुहराको जोडीसँग २–० को सोझो सेटमा पराजित हुँदै पहिलो चरणबाटै बाहिरिएको थियो।
शिभाली महिला एकलमा पनि पहिलो चरणबाटै बाहिरिएकी थिइन्। उनी दक्षिण कोरियाकी बाक दायोनसँग २–० ले पराजित भएकी थिइन्। महिला एकलमै स्वस्तिका जापानकी मोयुका उचिजिमासँग २–० ले पराजित हुँदै पहिलो चरणबाट बाहिरिइन्।
नेपालका प्रदीप खड्का र अभिषेक बास्तोलाको जोडी भने पुरुष डबल्सको दोस्रो चरणमा पुगेको छ। उनीहरूले मंगोलियाका मुन्खबातार बाड्राख र उर्नुख जोलबदारको जोडीलाई २–१ को सेटमा पराजित गरेका थिए।
प्रकाशित मिति: सोमबार, असोज १२, २०८३
-1787133994.jpg)
