काठमाडौं । एसियाली खेलकुदमा नेपाली मुक्केबाज खगेन्द्र रोकामगर अन्तिम–१६ बाट बाहिरिएका छन्।
शुक्रबार निशियो जिम्नेसियममा भएको पुरुष ६० केजी तौल समूहको स्पर्धामा खगेन्द्र फिलिपिन्सका जुनमिलार्डो ओगायरेसँग अंकका आधारमा ५–० ले पराजित भए।
यसअघि खगेन्द्रले अन्तिम–३२ को खेलमा मकाओका अल्भिन जोन रेयेसलाई ५–० ले पराजित गर्दै अन्तिम–१६ मा स्थान बनाएका थिए।
शुक्रबार नै भएको महिला ५४ केजीको प्रारम्भिक चरणमा नेपालकी अस्मिता दुवाल जापानकी सुकुमी नामिकीसँग अंकका आधारमा ५–० ले पराजित भइन्।
अब नेपालका लागि रवीन नेपालले पुरुष ९० केजी तौल समूहमा प्रतिस्पर्धा गर्न बाँकी छ।
यसअघि पुरुष ७० केजीमा दानबहादुर दर्लामी इराकका अली कासिम हमदान अल–सर्रेसँग, ५५ केजीमा चन्द्रबहादुर थापामगर भारतका मन्देगबाम जादुमणि सिंहसँग, महिला ५१ केजीमा रमिशा श्रेष्ठ भियतनामकी एनगुएन थी टामसँग तथा महिला ६५ केजीमा कुसुम तामाङ चीनकी शु लीसँग पराजित भएका थिए।
प्रकाशित मिति: शुक्रबार, असोज ९, २०८३
