काठमाडौं । जनकपुर बोल्ट्सले नेपाल प्रिमियर लिग (एनपीएल)को तेस्रो सिजनका लागि पाकिस्तानी ब्याटर इफ्तिखर अहमदलाई अनुबन्ध गरेको छ।
जनकपुरले सामाजिक सञ्जालमार्फत अहमदलाई टोलीमा अनुबन्ध गरिएको जानकारी दिएको हो।
अहमद जनकपुरले अनुबन्ध गरेको तेस्रो विदेशी खेलाडी हुन्। यसअघि टोलीले हरमित सिंह र जिमी निशमसँग सम्झौता गरिसकेको छ।
अनुभवी ब्याटर अहमदले टेस्ट, एकदिवसीय र टी–२० अन्तर्राष्ट्रिय क्रिकेटमा पाकिस्तानको प्रतिनिधित्व गरेका छन्। उनले ६६ टी–२० अन्तर्राष्ट्रिय खेलमा चार अर्धशतकसहित ९८९ रन बनाएका छन्।
बलिङमा पनि योगदान दिन सक्ने अहमदले टी–२० अन्तर्राष्ट्रियमा ८ विकेट लिएका छन्।
अहमदले पाकिस्तान सुपर लिग (पीएसएल), क्यारेबियन प्रिमियर लिग (सीपीएल), बंगलादेश प्रिमियर लिग (बीपीएल) र लंका प्रिमियर लिग (एलपीएल) खेलिसकेका छन्।
उनले पीएसएलको उपाधि दुईपटक जितेका छन्। सन् २०१७ मा पेशावर जाल्मी र २०१८ मा इस्लामाबाद युनाइटेडबाट खेल्दै उनी पीएसएल च्याम्पियन बनेका थिए।
प्रकाशित मिति: बिहीबार, असोज ८, २०८३
