काठमाडौं । २०औं एसियन गेम्स २०२६ अन्तर्गत पौडीको महिला १०० मिटर फ्रिस्टाइलमा नेपालकी आर्या महर्जन हिट चरणबाटै बाहिरिएकी छन्।
मंगलबार टोकियो एक्वाटिक सेन्टरमा भएको प्रतिस्पर्धामा आर्याले १ मिनेट ४.३५ सेकेन्डको समय निकालिन्। ३५ खेलाडी सहभागी स्पर्धामा उनी समग्रमा ३०औं स्थानमा रहिन्।
यसअघि सोमबार आर्या ५० मिटर ब्याकस्ट्रोकमा ३३.४० सेकेन्डको समयसहित ३१ खेलाडीमध्ये २७औं स्थानमा रहेकी थिइन्। सोमबार नै डुवाना लामा, जादेन श्रेष्ठ र एर्भिन श्रेष्ठ पनि आ–आफ्ना स्पर्धाबाट बाहिरिएका थिए।
अब एसियाड २०२६ मा पौडीतर्फ नेपालको तीन स्पर्धा मात्र बाँकी छन्। डुवानाले १०० मिटर ब्रेस्ट्रोक, अभिव प्रधानले ५० मिटर बटरफ्लाइ तथा जादेन श्रेष्ठले ५० मिटर ब्रेस्ट्रोकमा प्रतिस्पर्धा गर्नेछन्।
प्रकाशित मिति: मंगलबार, असोज ६, २०८३
