काठमाडौं । लगातार दोस्रो हारसँगै नेपाल एसियाली खेलकुदको टेबल टेनिस टिम इभेन्टमा समूह चरणबाटै बाहिरिएको छ ।
सोमबार नागोयास्थित स्काइ हल टोयोटामा भएको खेलमा नेपाल पुरुषतर्फ बहराइनसँग ३–० र महिलातर्फ मकाओसँग ३–१ ले पराजित भयो ।
पुरुषतर्फ रुवीन महर्जन, संयोग कपाली र गणञ्जय दाहालले प्रतिस्पर्धा गरेका थिए । समूह ‘सी’को खेलमा संयोग रुवीन र गणञ्जय क्रमशः रासिद, मोहम्मद सालेह र मोहम्मद अलालीसँग पराजित भए ।
महिलातर्फ समूह ‘ए’मा इभाना थापा, नवीता श्रेष्ठ र योङगी पौडेलले नेपालको प्रतिनिधित्व गरेका थिए । इभाना र योङगी आ–आफ्नो खेलमा पराजित हुँदा अनुभवी नवीता श्रेष्ठले चेओक कुआनलाई हराउँदै नेपाललाई १–१ को बराबरीमा ल्याएकी थिइन् । तर चौथो खेलमा नवीता यु लिङ झुसँग पराजित भएपछि नेपाल ३–१ ले स्तब्ध भयो ।
यसअघि नेपाल पुरुषतर्फ चाइनिज ताइपेईसँग र महिलातर्फ चीनसँग समान ३–० ले पराजित भएको थियो ।
प्रकाशित मिति: सोमबार, असोज ५, २०८३
