काठमाडौं । प्रधानमन्त्री केपी शर्मा ओलीले सोमबार भएको जेनजीहरूको आन्दोलनमा अराजक तत्वहरूको घुसपैठ भएको बताएका छन्। सोमबार साँझ बसेको मन्त्रिपरिषद् बैठकमा उनले प्रदर्शनबारे ब्रिफिङ गर्दै यस्तो टिप्पणी गरेका हुन्।
प्रधानमन्त्री ओलीका अनुसार जेनजीहरू शान्तिपूर्ण र सकारात्मक ढंगले सडकमा उत्रिएका थिए। तर, बाह्य घुसपैठका कारण आन्दोलन हिंसात्मक बनेको र कैयौं युवाले ज्यान गुमाउनुपरेको उनले बताए।
‘युवा पुस्ताले शान्तिपूर्ण तरिकाले प्रदर्शन गर्ने अपेक्षा थियो। सरकार पनि संवेदनशील थियो,’ प्रधानमन्त्रीले भने, ‘तर, त्यस आन्दोलनमा घुसपैठ भएको महसुस भएको छ। यो कुरा जेनजीले पनि स्वीकार गरेका छन्।’
बैठकमा प्रधानमन्त्रीले सामाजिक सञ्जाल बन्द गर्ने निर्णय तत्काल कार्यान्वयन गर्न नसकिने धारणा पनि राखेका थिए।
प्रकाशित मिति: सोमबार, भदौ २३, २०८२
