काठमाडौं । सामाजिक सञ्जाल बन्दको विरोधमा सोमबार देशभर भड्किएको जेनजीहरूको आन्दोलन हिंसात्मक बन्दै गएपछि मृत्यु हुनेको संख्या १९ पुगेको छ । स्वास्थ्य तथा जनसंख्या मन्त्रालयले दिएको विवरणअनुसार विभिन्न अस्पतालमा उपचाररत ३ सय ४७ जना घाइते छन्, जसमा धेरैको अवस्था गम्भीर छ ।
राजधानी काठमाडौंमा सबैभन्दा बढी जनहानि भएको छ । सिभिल अस्पतालमा ३, राष्ट्रिय ट्रमा सेन्टरमा ८, एभरेष्ट अस्पतालमा ३, केएमसी अस्पतालमा २ र त्रिवि शिक्षण अस्पतालमा १ जनाको ज्यान गएको मन्त्रालयले जनाएको छ । राजधानीबाहिर मोरङस्थित विपि कोइराला स्वास्थ्य विज्ञान प्रतिष्ठानमा थप २ जनाको मृत्यु भएको पुष्टि भएको छ । अन्य प्रदेशका अस्पतालहरूमा घाइतेहरू उपचाररत भए पनि मृतक संख्या बढेको छैन ।
बिहानैदेखि काठमाडौं उपत्यका, विराटनगर, पोखरा, चितवन, नेपालगञ्जलगायतका शहरमा ठूलो संख्यामा प्रदर्शनकारी सडकमा उत्रिएका थिए । नयाँबानेश्वर, माइतीघर र रत्नपार्क क्षेत्रमा प्रहरीले अश्रुग्यास र पानीको फोहोरा प्रहार गरे पनि भिड तितरबितर नभएपछि दिउँसो संसद भवनतर्फ लम्केका प्रदर्शनकारीलाई रोक्न गोली चलाउनुपर्यो । त्यसपछि मृत्यु हुनेको संख्या क्रमशः बढ्दै गयो । काठमाडौं उपत्यकामा दिउँसो एक बजेदेखि निषेधाज्ञा जारी गरिएको थियो तर प्रदर्शनकारीले निषेधाज्ञा तोड्दै अघि बढेपछि सेना समेत परिचालन गरिएको हो ।
देशका अन्य भागमा पनि आन्दोलन उग्र बनेको थियो । विभिन्न ठाउँमा प्रदर्शनकारी र सुरक्षाकर्मीबीच झडप हुँदा ठूलो संख्यामा घाइते परेका छन् । धेरैलाई गोली, टाउको र शरीरका विभिन्न भागमा गम्भीर चोट लागेको छ ।
मृत्युसंख्या बढ्दै गएपछि प्रमुख प्रतिपक्षी दल नेपाली कांग्रेस र नेकपा माओवादी केन्द्रले सरकारलाई ‘जनतामाथि नरसंहार’ गरेको आरोप लगाउँदै गृहमन्त्री र प्रधानमन्त्रीको राजीनामा माग गरेका छन् । उनीहरूले सरकारको बलप्रयोगले स्थिति झनै बिग्रिने चेतावनी दिएका छन् । राजधानीसहितका संवेदनशील क्षेत्रमा अहिले कडा सुरक्षा व्यवस्था गरिएको छ । सेना र प्रहरी संयुक्त गस्तीमा छन् भने सिंहदरबार, शितल निवास, लैनचौर र नयाँबानेश्वर क्षेत्रलाई उच्च सतर्कतामा राखिएको छ ।
प्रकाशित मिति: सोमबार, भदौ २३, २०८२
