काठमाडौं । नेकपा एमालेको विधान महाधिवेशनमा ७० वर्ष नाघेका कार्यकर्तालाई मानार्थ सदस्यता दिने र सदस्यता शुल्क नलिने व्यवस्था गर्ने प्रस्ताव आएको छ ।
समूहगत छलफलमा प्रतिनिधि कमल पाठकले यस्तो प्रस्ताव अघि सारेका हुन् । उनले भने, “राज्यले ७० वर्ष नाघेकालाई सम्मान गर्छ, हामी पनि मानार्थ सदस्यता दिऊँ । मर्ने बेलासम्म लेवी उठाउने कुरा गलत हो ।”
एमालेले हाल दुई प्रकारका सदस्यता — पार्टी सदस्य र संगठित सदस्य — को व्यवस्था प्रस्ताव गरेको छ । दुवै सदस्यताका लागि नीति–विचार समर्थन गर्ने र तोकिएको शुल्क तिर्नुपर्ने उल्लेख छ । तर पाठकले यसमा संशोधन गर्दै मानार्थ सदस्यता थप्ने र मानार्थ सदस्यसँग शुल्क नलिने प्रस्ताव गरेका हुन् ।
यससँगै, एमालेमा अहिले प्रचलित ७० वर्षे उमेर हदको व्यवस्था हटाउने प्रस्ताव पनि महाधिवेशनमा आएको छ । अहिले ७० वर्ष नाघेकाहरू कुनै पनि तहमा निर्वाचित हुन पाउँदैनन् ।
त्यस्तै, पार्टीको नेतृत्व तहमा उम्मेदवार बन्नका लागि स्कुल विभागले आयोजना गर्ने प्रशिक्षणमा अनिवार्य सहभागिता गर्नुपर्ने व्यवस्था पनि प्रस्ताव गरिएको छ । यसलाई एमालेले आफ्ना नेताहरूलाई नीतिसँग अझ नजिक ल्याउने प्रयासका रूपमा व्याख्या गरेको छ ।
ललितपुरको गोदावरीमा जारी विधान महाधिवेशन अन्तिम चरणमा पुगेको छ । शनिबार भएका समूहगत छलफलका प्रतिवेदन आज प्रस्तुत गरिँदैछन् । त्यसपछि अध्यक्ष केपी शर्मा ओली, उपाध्यक्ष विष्णु पौडेल र महासचिव शंकर पोखरेलले क्रमशः राजनीतिक, विधान संशोधन र सांगठनिक प्रतिवेदनबारे उठेका प्रश्नहरूको जवाफ दिनेछन् । संशोधनसहितका प्रतिवेदन पारित भएपछि आजै महाधिवेशन समापन हुनेछ ।
प्रकाशित मिति: आइतबार, भदौ २२, २०८२
