काठमाडौं । नेकपा एमालेका अध्यक्षसमेत रहेका प्रधानमन्त्री केपी शर्मा ओलीले राष्ट्रिय स्वतन्त्र पार्टी (रास्वपा) लाई लक्षित गर्दै ती पार्टीको इतिहास र योगदान नै नभएको कठोर टिप्पणी गरेका छन्।
शुक्रबार सुरु भएको एमालेको विधान महाधिवेशनको उद्घाटन समारोहमा सम्बोधन गर्दै ओलीले रास्वपालाई परोक्ष तर कडा शब्दमा आलोचना गरे। उनले रास्वपालाई कुनै ऐतिहासिक पृष्ठभूमि नभएको, देश र समाजको लागि योगदान नपुगेको र अहिले पनि ठोस उपस्थितिबाट वञ्चित रहेको भन्दै टिप्पणी गरे।
ओलीले भने, “जसको न इतिहास थियो, न आज छ। कसैले आरीबाट घोप्टाइदिएका त्यस्ता तत्वहरूको बहाब आएको छ। के को बहाब आएको हो, त्यो त तत्वहरूको छानबिन गर्दै जाने हो।”
उनको यो अभिव्यक्ति प्रतिनिधि सभामा ठुलो शक्ति भएर उदाएको रास्वपालाई लक्षित भएको भन्दै राजनीतिक विश्लेषकहरूले मूल्यांकन गरेका छन्। हालैका केही वर्षयता पुराना ठूला दलहरूको विकल्पका रूपमा प्रस्तुत भएको रास्वपाले संसद्मा जनताको उल्लेखनीय मत प्राप्त गरेको थियो। तर प्रधानमन्त्री ओलीले सो पार्टीलाई टिकाउ नहुने संकेत गर्दै इतिहासविहीन दलको रूपमा व्याख्या गरेका हुन्।
विधान महाधिवेशन उद्घाटनका क्रममा ओलीले आफ्नै पार्टी एमालेको भूमिकाबारे पनि जोड दिए। उनले एमाले ऐतिहासिक रूपमा जनताबीच गढिएको र संघर्षमार्फत आएको पार्टी भएको भन्दै त्यसलाई क्षणिक ‘लहर’ वा ‘बहाब’सँग तुलना गर्नै नसकिने बताए।
राजनीतिक वृत्तमा ओलीको यो टिप्पणीलाई दुई तरिकाले हेरिएको छ – पहिलो, आगामी चुनावमा एमालेलाई बहुमत दिने माहोल बनाउन प्रतिस्पर्धी दलप्रति प्रहारको रणनीति; दोस्रो, नयाँ दलहरूको लोकप्रियता घटाउँदै पुराना पार्टीको भूमिका अझै प्रमुख छ भन्ने सन्देश दिन खोजिएको संकेत।
रास्वपाले भने ओलीको आलोचनाबारे तत्काल आधिकारिक प्रतिक्रिया दिएको छैन। तर अघिल्ला अवसरहरूमा सो पार्टीका नेताहरूले आफूहरूले जनताको भावनाबाट जन्मिएको पार्टी भएको र पुराना दलहरूको असफलताले नयाँ दललाई ठाउँ बनाइदिएको दाबी गर्दै आएका छन्।
नेपालको राजनीति हाल पुराना दल र नयाँ दलबीचको प्रतिस्पर्धात्मक बहसमा केन्द्रित भएको अवस्थामा ओलीको यो टिप्पणीले थप तातो बहस निम्त्याउने देखिएको छ।
प्रकाशित मिति: शुक्रबार, भदौ २०, २०८२
