काठमाडौं । नेकपा एमालेका अध्यक्ष तथा प्रधानमन्त्री केपी शर्मा ओलीले २०८४ सालमा हुने आगामी आम निर्वाचनमा आफ्नो पार्टीलाई रोक्ने शक्ति कुनै पनि नहुने दाबी गरेका छन् । उनले सक्रिय जनसंपर्क, संगठन सुदृढीकरण र सदस्य–समर्थक परिचालनमार्फत एमाले एकल बहुमतमा पुग्ने विश्वास व्यक्त गर्दै धाँधली हुने सम्भावनालाई समेत अस्वीकार गरे ।
शुक्रबारदेखि सुरु भएको एमालेको दोस्रो विधान महाधिवेशनको उद्घाटन सत्रलाई सम्बोधन गर्दै ओलीले पार्टीको संगठनात्मक शक्तिबारे आत्मविश्वासपूर्ण अभिव्यक्ति दिएका हुन् । उनले भने, “०८४ मा हामीले कम्तिमा एकल बहुमत ल्याउनैपर्छ । हामी सक्रिय भएर जनतामाझ पुग्यौं भने, हाम्रा कार्यकर्ता र समर्थक परिचालित भए भने, एमालेलाई बहुमत ल्याउन कसैले रोक्न सक्दैन ।”
प्रधानमन्त्री ओलीले निर्वाचन प्रक्रियाप्रति देखिँदै आएको अविश्वासलाई सम्बोधन गर्दै आगामी निर्वाचन पूर्णतः निष्पक्ष, स्वतन्त्र र शान्तिपूर्ण हुने प्रतिबद्धता व्यक्त गरे । “हामी अहिले सरकारमै छौं । आउँदो निर्वाचनमा कसैले धाँधली गर्न सक्दैन । बरु, हामी सरकारमै रहेर धाँधली रोक्नेछौं,” उनले ठोकुवा गरे ।
ओलीको भनाइअनुसार एमालेको मुख्य लक्ष्य २०८४ सालको निर्वाचनमा स्पष्ट बहुमत ल्याएर स्थिर सरकारको आधार तयार गर्नु हो । उनका अनुसार देशलाई राजनीतिक अस्थिरता र सत्ता बदलाको दुष्चक्रबाट मुक्त गर्न बलियो र आत्मनिर्भर सरकार अपरिहार्य छ ।
त्यस्तै उनले पार्टीका नेता तथा कार्यकर्तालाई संगठनभित्रको एकतालाई अझ मजबुत बनाउन, गाउँ–गाउँमा पुगेर आम नागरिकका समस्या सुन्न र समाधानको खाका प्रस्तुत गर्न निर्देशन दिएका छन् । उनले पार्टीभित्र छलफल र विचार विमर्शलाई व्यवस्थित गर्दै आगामी निर्वाचनका लागि साझा रणनीति बनाउने आवश्यकता औंल्याए ।
ओलीले पार्टीका कार्यकर्तालाई जनताबीच पुग्दा राष्ट्रिय स्वाभिमान, विकास र सुशासनका एजेन्डा लिएर जाने सुझाव पनि दिए । उनले भने, “जनताको विश्वास जित्नका लागि हामीले देशको हितलाई पहिलो प्राथमिकतामा राख्नुपर्छ । यही हाम्रो चुनावी अभियानको आधार बन्नुपर्छ ।”
महाधिवेशनको उद्घाटन सत्रमा ओलीले राखेको सम्बोधनलाई एमाले नेताहरूले २०८४ सालको निर्वाचन अभियानको औपचारिक सुरुवातका रूपमा लिएका छन् । उनका अनुसार पार्टीभित्र संगठनात्मक सुदृढीकरणसँगै नयाँ पुस्तालाई नेतृत्वमा अगाडि ल्याउने तयारी समेत भइरहेको छ ।
प्रकाशित मिति: शुक्रबार, भदौ २०, २०८२
