काठमाडौं । राष्ट्रिय स्वतन्त्र पार्टी (रास्वपा) ले सहकारी, मिटर ब्याज, कृषि र मानव तस्करीजस्ता विषयमा सरकारसँग स्पष्ट जवाफ माग गरेको छ।
प्रतिनिधिसभाको बिहीबारको बैठकमा बोल्दै रास्वपाका सांसद अशोककुमार चौधरीले प्रश्न गर्दै भने, “सहकारी पीडितको ८८ अर्ब कहिले फिर्ता हुन्छ ? किसानलाई मल र भुक्तानी कहिले दिने ? मिटर ब्याज पीडितले न्याय कहिले पाउने ? र भिजिट भिसा मानव तस्करीको फाइल कहाँ हराएको छ ?”
उनले तीन दशकभन्दा बढी समयदेखि नदी–नाला, कलकारखाना बेच्ने, युवालाई परदेशको भट्टीमा धकेल्ने र सहकारीमा अरबौँको भ्रष्टाचार गर्नेहरू नै अहिले रास्वपालाई पाठ पढाउन खोजिरहेको भन्दै कटाक्ष गरे।
चौधरीले दलाल संस्कार, भ्रष्टाचार र लुटतन्त्रकै कारण मुलुक खोक्रो बनेको दाबी गर्दै अब जनता मौन नबस्ने चेतावनी पनि दिए। उनले भने, “२०८४ सम्म सहन्छौँ, त्यसपछि हेर्नेछौँ।”
प्रकाशित मिति: बिहीबार, भदौ १९, २०८२
