काठमाडौं । नेपाली कांग्रेसले रामहरि खतिवडालाई संसदीय सुनुवाइ समिति सभापति बनाउने तयारी गरेको छ।
संसदीय सुनुवाइ समिति सभापति पद भदौ १० गतेदेखि रिक्त छ। तत्कालीन सभापति ईश्वरीदेवी न्यौपानेले राजीनामा दिएर त्यही दिन राज्य व्यवस्था तथा सुशासन समिति सभापति पद सम्हालेकी थिइन्। त्यसअघि उक्त समितिको नेतृत्व खतिवडाकै जिम्मामा थियो।
निजामती सेवा विधेयकमा कुलिङ पिरियडसम्बन्धी प्रावधानमा त्रुटि भएको भन्दै छानबिन समितिले खतिवडालाई नैतिक जिम्मेवार ठहर गरेको थियो। त्यसपछि उनले साउन २७ गते पदबाट राजीनामा दिएका थिए। तर, खतिवडाले बैठकमा निरन्तर दुई वर्षको कुलिङ पिरियड कायम राख्नुपर्ने अडान लिँदै आएका थिए।
अब कांग्रेसले उनलाई संसदीय सुनुवाइ समितिमा पठाउने र सभापति बनाउने तयारी गरेको हो। बिहीबार सभापति पदका लागि मनोनयन दर्ता हुने छ।
पार्टी नेतृत्वभित्र छलफलका क्रममा शेरबहादुर देउवा र पूर्णबहादुर खड्का खतिवडालाई नै राज्य व्यवस्था समिति सभापति कायम राख्न चाहन्थे। तर महामन्त्रीद्वय गगन थापा र विश्वप्रकाश शर्मा असहमत भएकाले अन्ततः न्यौपानेलाई त्यहाँ जिम्मेवारी दिइएको थियो।
स्रोतका अनुसार प्रमुख सचेतक श्यामकुमार घिमिरेलाई पनि सुनुवाइ समिति सभापति बनाउन खोजिएको थियो तर उनले अस्वीकार गरेपछि कांग्रेसले पुनः खतिवडालाई अघि सार्ने निर्णय लिएको हो।
खतिवडाले आफू मन्त्री बन्ने चाहना पनि पार्टी नेताहरूसँग प्रकट गरेका थिए। तर, पार्टी स्रोतले भनेको छ— “सुनुवाइ समिति सभापति बनेरै पनि भविष्यका जिम्मेवारीका बाटा बन्द हुने होइन।”
प्रकाशित मिति: बिहीबार, भदौ १९, २०८२
