काठमाडौं । नेकपा एमालेका सांसद सुहाङ नेम्वाङले सवारी साधनमा इम्बोस्ड नम्बर प्लेट जडान तत्काल रोक्न सरकारलाई आग्रह गरेका छन्।
बुधबार प्रतिनिधि सभाको बैठकमा बोल्दै उनले इम्बोस्ड नम्बर प्लेट सम्बन्धी नीति जनतासँग प्रत्यक्ष जोडिएको गम्भीर विषय भएको उल्लेख गर्दै आवश्यक पूर्वाधार, प्रविधि र जनचेतना सुनिश्चित नभएसम्म यसको कार्यान्वयन अघि बढाउन नहुने बताए।
‘इम्बोस्ड नम्बर प्लेटले सहजभन्दा बढी समस्या र झन्झट मात्र बढाएको छ,’ उनले भने, ‘पहिले नै गाडीधनीहरू उच्च कर, बीमा, सडक कर र लाइसेन्स प्रक्रियाबाट थकित भएका छन्। यस्तो अवस्थामा थप बोझ थोपार्नु जनतामाथि अन्याय हो।’
नेम्वाङले जनताकै तहबाट इम्बोस्ड नम्बर प्लेटप्रति प्रश्नहरू उठिरहेको उल्लेख गरे।
‘यसको वास्तविक उद्देश्य के हो ? पर्याप्त प्रविधि, सेवा केन्द्र र जनशक्ति छन् ? जब हजारौँ नागरिकले वर्षौँ पर्खेर पनि लाइसेन्स पाएका छैनन्, कर तिर्न दिनभर लाइन बस्नुपरेको छ, त्यस्तो अवस्थामा यो किन अनिवार्य गरिँदैछ ?’ उनले प्रश्न गरे।
उनका अनुसार जनताले भाषा, संस्कृति र भावनासँग जोडेर पनि इम्बोस्ड नम्बर प्लेटमाथि आपत्ति जनाइरहेका छन्, त्यसलाई वेवास्ता गर्न नहुने उनको भनाइ छ।
प्रकाशित मिति: बुधबार, भदौ १८, २०८२
