काठमाडौं । सत्तारुढ दल नेकपा (एमाले)ले विधान अधिवेशनको तयारीका लागि सचिवालय बैठक बोलाएको छ । बैठक आगामी भदौ १९ गते दिउँसो ३ बजे पार्टी केन्द्रीय कार्यालय च्यासलमा बस्ने प्रचार विभाग प्रमुख राजेन्द्र गौतमले जानकारी दिए ।
उनका अनुसार, बैठकमा अध्यक्ष केपी शर्मा ओलीको राजनीतिक प्रतिवेदन, उपाध्यक्ष विष्णु पौडेलले प्रस्तुत गर्ने विधान संशोधन प्रतिवेदन र महासचिव शंकर पोखरेलको संगठनात्मक प्रतिवेदनमाथि मुख्य छलफल हुनेछ ।
यसअघि बोलाएर स्थगित गरिएको केन्द्रीय कमिटी बैठक अब नबस्ने पनि गौतमले स्पष्ट पारे । उनका भनाइमा, विधान अधिवेशनको तयारीलाई प्राथमिकता दिइनु परेकाले फेरि केन्द्रीय कमिटी बैठक गर्ने सम्भावना छैन ।
प्रकाशित मिति: मंगलबार, भदौ १७, २०८२
