काठमाडौं । प्रधानमन्त्री केपी शर्मा ओलीका आर्थिक तथा विकास सल्लाहकार डा. युवराज खतिवडाले नेपाल चीनको ग्लोबल सेक्युरिटी इनिसियटिभ (जीएसआई) मा समर्थनमा उभिएको भन्ने व्याख्या असत्य भएको प्रष्ट पारेका छन्।
चीनको तियान्जिनमा भएको सांघाई सहयोग संगठन (एससीओ) प्लस को शिखर सम्मेलनकै क्रममा भदौ १४ गते प्रधानमन्त्री ओली र राष्ट्रपति सी चिनफिङबीच भएको भेटवार्तामा सहभागी खतिवडाले, नेपालको संविधान र असंलग्न परराष्ट्र नीतिको आधारमा नेपाल कुनै पनि मुलुकको सुरक्षा रणनीतिको हिस्सा नबन्ने बताए।
चीनले भेटपछिको विज्ञप्तिमा नेपालले जीएसआईलाई समर्थन गरेको झल्काउने शब्द प्रयोग गरेपछि उठेका प्रश्नप्रति खतिवडाले प्रतिक्रिया दिंदै भने,
“प्रधानमन्त्री ओलीको भ्रमण मुलतः एससीओ प्लस सम्मेलनकै लागि हो। यस्ता साइडलाइन वार्तामा कुनै नयाँ सहमति वा समझदारीमा हस्ताक्षर हुँदैन। नेपाल जीएसआईको पक्षमा उभिएको भन्ने कुरा पूर्णतया गलत प्रचार हो।”
उनका अनुसार भ्रमणको केन्द्र नेपाल–चीनबीच पहिल्यै भएका बेल्ट एण्ड रोड इनिसियटिभ (बीआरआई) लगायतका सम्झौता कार्यान्वयनमा प्राथमिकता दिने विषय थियो। उनले सञ्चारमाध्यम र सामाजिक सञ्जाल प्रयोगकर्ताहरुलाई यथार्थ बुझेर मात्रै टिप्पणी गर्न आग्रह पनि गरे।
खतिवडाले दुई देशबीच सम्पर्क सञ्जाल विस्तार, औद्योगिक तथा पूर्वाधार विकास, स्वास्थ्य, कृषि, व्यापार, पर्यटन, लगानी, विज्ञान तथा प्रविधि, खेलकुद, प्राकृतिक प्रकोप व्यवस्थापन, जनस्तरको सम्बन्ध र गरिबी निवारणजस्ता क्षेत्रमा सहकार्यबारे छलफल भएको जानकारी दिए।
प्रधानमन्त्री ओलीको यस अघिको चीन भ्रमणमा भने, चिनियाँ प्रधानमन्त्री लि छ्याङको उपस्थितिमा टोखा–छहरे सुरुङमार्ग, नेपाल–चीन व्यापार अभिवृद्धि तथा भैसीँको मासु निर्यातलगायत विषयमा सहमति पत्रमा हस्ताक्षर भएको स्मरण उनले गराए।
प्रकाशित मिति: सोमबार, भदौ १६, २०८२
