काठमाडौं । प्रधानमन्त्री केपी शर्मा ओलीको चीन भ्रमणका क्रममा नेपालले फेरि एक पटक ‘एक-चीन नीति’प्रति आफ्नो दृढ अडान स्पष्ट गरेको छ। राष्ट्रपति सी जिनफिङसँगको भेटवार्तापछि जारी चीनको विदेश मन्त्रालयको वक्तव्यमा नेपालले ‘ताइवान स्वतन्त्रता’लाई समर्थन नगर्ने प्रतिबद्धतालाई प्राथमिकतासहित उल्लेख गरिएको छ।
प्रधानमन्त्री ओलीले नेपाल कुनै पनि शक्ति वा समूहलाई आफ्नो भूमि प्रयोग गरी चीनको हितविरुद्ध गतिविधि गर्न नदिने अडान दोहोर्याएका छन्। साथै उनले नेपाल–चीन सम्बन्धले विभिन्न चुनौतीहरू पार गर्दै अझ मजबुत र विश्वासमा आधारित बनेको बताएको वक्तव्यमा जनाइएको छ।
नेपालले चीनको ग्लोबल डेभलपमेन्ट इनिसिएटिभ, ग्लोबल सेक्युरिटी इनिसिएटिभ र ग्लोबल सिभिलाइजेशन इनिसिएटिभलाई समर्थन गर्ने प्रतिबद्धता पनि व्यक्त गरेको छ।
त्यस्तै, राष्ट्रपति सीले नेपाल–चीन सम्बन्ध हिमाल र नदीले मात्र होइन, सात दशक लामो मित्रता र विश्वासले पनि जोडिएको भन्दै दुई देशले कठिनाइ र सुख–दुःखमा सँगै अघि बढेको स्मरण गराए। उनले बेल्ट एन्ड रोड इनिसिएटिभ (BRI) अन्तर्गतको सहकार्य स्थिर रूपमा अघि बढिरहेको पनि उल्लेख गरेका छन्।
प्रकाशित मिति: आइतबार, भदौ १५, २०८२
