काठमाडौं । प्रधानमन्त्री केपी शर्मा ओलीले लिपुलेकलाई व्यापारिक मार्ग बनाउने चीन–भारतबीचको सहमतिप्रति आपत्ति जनाएका छन्।शनिबार दिउँसो चिनियाँ राष्ट्रपति सी जिनफिङसँगको भेटवार्तामा प्रधानमन्त्री ओलीले उक्त सहमतिलाई अस्वीकार गर्दै नेपालले यो विषयमा स्पष्ट धारणा राखेको जानकारी परराष्ट्र सचिव अमृत राईले दिएका छन्।
प्रधानमन्त्री ओलीको भनाइ उद्धृत गर्दै राईले भने, ‘नेपाली भूमि लिपुलेकलाई व्यापारिक मार्ग बनाउने विषयमा चीन र भारतबीच भएको सहमतिप्रति मैले राष्ट्रपति सीलाई आपत्ति प्रकट गरेको छु। सन् १८१६ को सुगौली सन्धिअनुसार महाकाली नदीपूर्वको भूभाग नेपालकै हो भन्ने कुरा स्पष्ट छ। यस विषयमा चीनले नेपाललाई सहयोग गर्ने विश्वास हामीलाई छ।’
भेटमा दुई देशबीचको मित्रता र सहकार्य अझै विस्तार गर्नेबारे पनि छलफल भएको र यसका लागि दुवै पक्षका संयन्त्रहरू सक्रिय हुने सहमति बनेको राईले जानकारी दिए।
प्रधानमन्त्री ओली शनिबार नै चीनको औपचारिक भ्रमणका लागि प्रस्थान गरेका हुन्। उनी एससीओ (शाङ्घाई सहयोग संगठन) शिखर सम्मेलनमा सहभागी हुन २३ सदस्यीय नेपाली प्रतिनिधिमण्डलको नेतृत्व गर्दै चीन पुगेका हुन्।
भ्रमण कार्यतालिकाअनुसार प्रधानमन्त्री ओलीले सेप्टेम्बर १ मा तियान्जिनमा आयोजना हुने शिखर सम्मेलनलाई सम्बोधन गर्नेछन् भने सेप्टेम्बर ३ मा बेइजिङमा हुने ८०औँ वार्षिकोत्सवको स्मृति समारोहमा समेत सहभागिता जनाउने कार्यक्रम छ। सो अवसरमा उनले विभिन्न विश्व नेतासँग द्विपक्षीय भेटवार्ता गर्ने तय भएको छ।
प्रकाशित मिति: शनिबार, भदौ १४, २०८२
