काठमाडौं । प्रधानमन्त्री केपी शर्मा ओली शनिबारदेखि चीनको चार दिने औपचारिक भ्रमणमा प्रस्थान गर्न लागेका छन्। उनले शुक्रबार प्रतिनिधि सभामा सम्बोधन गर्दै भ्रमणका उद्देश्य र कार्यतालिकाबारे विस्तृत जानकारी दिएका थिए।
ओलीले आफ्नो भ्रमणको मूल उद्देश्य चीनको थियानजिन सहरमा हुने साङ्घाई सहयोग संगठन (एससिओ) को शिखर सम्मेलनमा सहभागी हुनु रहेको बताए। सन् २००१ मा स्थापना भएको एससिओ अहिले विश्वकै ठूलो क्षेत्रीय संगठनमध्ये एक भइसकेको उल्लेख गर्दै उनले चीन, रूस, भारत, पाकिस्तानसहित १० सदस्य राष्ट्र, दुई पर्यवेक्षक मुलुक र नेपालसहित १५ संवाद साझेदार राष्ट्र रहेको जानकारी दिए।
नेपाल २०१६ देखि यस संगठनको संवाद साझेदार रहेको उल्लेख गर्दै उनले यस भ्रमणमार्फत् नेपालको सहभागिता स्तर वृद्धि गर्न, समसामयिक क्षेत्रीय–अन्तर्राष्ट्रिय विषयमा आफ्नो दृष्टिकोण प्रस्तुत गर्न र नेपालका हितलाई प्रवर्द्धन गर्ने अवसर प्राप्त हुने बताए।
प्रधानमन्त्री ओलीले भ्रमणका क्रममा चीनका राष्ट्रपति शी चिनफिङसँग दुई पक्षीय भेट हुने र बेइजिङमा उपराष्ट्रपति हान चङ्गसँग पनि भेट हुने कार्यतालिका रहेको जानकारी दिए। साथै दुवै उच्च पदस्थ नेतृत्वले आयोजना गर्ने औपचारिक रात्रिभोजमा नेपाल सहभागी हुने कार्यक्रम छ।
भदौ १६ गते हुने एससिओ प्लस शिखर सम्मेलनमा ओलीले सम्बोधन गर्नेछन्। सो अवसरमा विभिन्न मित्रराष्ट्रका शीर्ष नेतृत्वसँग छुट्टाछुट्टै भेटघाट हुने कार्यक्रम छ। हालसम्म रुसी राष्ट्रपति भ्लादिमीर पुटिन, माल्दिभ्सका राष्ट्रपति मोहम्मद मिज्जु, क्याम्बोडियाका प्रधानमन्त्री सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङसँग भेट तय भइसकेको छ।
यस्तै, भ्रमणको अन्तिम दिन बेइजिङमा आयोजना हुने फासिवादविरुद्धको विश्वयुद्ध र जापानविरुद्धको चिनियाँ प्रतिरोधी युद्धमा विजय प्राप्तिको ८०औँ वार्षिकोत्सव समारोहमा पनि नेपालको उच्चस्तरीय प्रतिनिधिमण्डल सहभागी हुनेछ। चीन सरकारका अनुसार सो समारोहमा ५० भन्दा बढी मुलुकका प्रतिनिधिहरूको सहभागिता रहनेछ।
प्रधानमन्त्रीले यो भ्रमणले नेपाल–चीनबीचको मैत्रीपूर्ण सम्बन्ध थप सुदृढ हुने र अन्तर्राष्ट्रिय मञ्चमा नेपालको छवि तथा प्रतिष्ठा उकासिने विश्वास व्यक्त गरे।
भ्रमण दलमा पूर्वउपप्रधानमन्त्री पूर्णबहादुर खड्का, मन्त्रीहरू रघुजी पन्त र बद्रीप्रसाद पाण्डे, प्रधानमन्त्रीका आर्थिक सल्लाहकार डा. युवराज खतिवडा, प्रतिनिधिसभा सदस्य छबिलाल विश्वकर्मा, राधिका शाक्यसहितका उच्च पदस्थ व्यक्तिहरू सहभागी हुने छन्।
प्रकाशित मिति: शुक्रबार, भदौ १३, २०८२
