काठमाडौं । प्रतिनिधि सभा बैठकमा बुधबार नेपाली कांग्रेसका सांसद विश्वप्रकाश शर्माले राष्ट्रिय स्वतन्त्र पार्टी (रास्वपा) सभापति रवि लामिछानेप्रति प्रहार गर्दै तीक्ष्ण टिप्पणी गरे।
अदालतको आदेशमाथि अघिल्लो दिनहरूमा कठोर आलोचना गर्ने रास्वपाले अहिले हस्ताक्षर अभियानमार्फत दबाब सिर्जना गर्न खोजेको भन्दै उनले व्यंग्यात्मक प्रश्न उठाए।
“हिजो ‘केरे केरे! तिम्रो पिताजीको शासन हो?’ भन्थ्यौ, आज हस्ताक्षर लिएर कसलाई दबाब दिन खोजेको?” शर्माले भने। उनले थपे, “यो दबाब अस्पताललाई हो, क्याम्पसलाई हो कि अदालतलाई?”
सांसद शर्माले रास्वपालाई सिक्ने प्रक्रियामा रहन सुझाव दिए।
“हामी पनि सिक्दै छौं, तर संसदले हाम्रो मात्र दृष्टिकोण मान्नुपर्छ भन्ने ‘मेरो गोरूको अठारै टक्का’ प्रवृत्तिमा हामी जाँदैनौं,” उनले भने।
रवि लामिछाने अहिले जेलमा भए पनि आदेश दिने स्वतन्त्रता रहेको तर उनका पार्टी सदस्यहरू बाहिर रहेर पनि कैदीझैं आदेश मान्न बाध्य रहेको उनले टिप्पणी गरे।
त्यस्तै, कांग्रेसबाट रास्वपामा गएका केही नेताहरूको प्रसंग उठाउँदै उनले भने, “बोल्ने तागत कांग्रेसभित्रै हुँदा मात्रै हो। यहाँबाट गएपछि त्यही तागत रहने अपेक्षा म गर्दिन।”
