काठमाडौं । नेकपा एमालेले पूर्वराष्ट्रपति विद्यादेवी भण्डारीलाई पुनः सक्रिय राजनीतिमा आउन नदिन गरेको निर्णयप्रति भण्डारीकी छोरी उषा किरणले आफू अचम्मित नरहेको प्रतिक्रिया दिएकी छन्।
फेसबुकमार्फत प्रतिक्रिया दिँदै उनले निर्णयको प्रक्रिया पहिल्यै बुझेकाले आश्चर्य नलागेको उल्लेख गरेकी हुन्। "निर्णय र निर्णयसम्म पुग्न गरिएका तिगडम दुवैबाट म चाहिँ अचम्मित छैन," उनले लेखेकी छन्, "म खुसी छु कि यो कुरा खुला रूपमा बाहिर आयो।"
उषा किरणले पुष्पलाल श्रेष्ठको परिवारजस्तै आफ्नो परिवार पनि राजनीति र पार्टीभित्रको व्यवहारबाट असहज अवस्थामा पुगेको उल्लेख गरिन्। "विगत एक महिनादेखि मलाई ज्ञान भयो– नैतिक समर्थन दिन पनि नसकिने स्तरसम्म पुर्याउने रहेछन्," उनले सामाजिक सञ्जालमा लेखेकी छन्।
च्यासलमा बसेको एमाले केन्द्रीय कमिटीको बैठक र त्यसबाट भएको निर्णयप्रति संकेत गर्दै उनले त्यसलाई "प्रकरण" भनेकी छन्। उनले लेखेकी छन्, "यो ज्ञानको बोझ आज यहाँ बिसाउने मौका यो प्रकरणले दियो– त्यसैले म यो प्रकरणलाई धन्यवाद दिन चाहन्छु।"
उषाको टिप्पणीले एमालेभित्रको शक्ति संघर्ष र पूर्वराष्ट्रपतिको भूमिकाबारे पुनः बहस सुरु हुने संकेत मिलेको छ।
प्रकाशित मिति: बुधबार, साउन ८, २०८२
