काठमाडौं । यमनको पश्चिमी तटमा एक महिनादेखि जारी लडाइँमा ५०० भन्दा बढी सरकारी सैनिक मारिएका छन् । करिब १ हजार ५०० सैनिक घाइते भएको यमनको सरकारी सुरक्षा बलले जनाएको छ ।
रणनीतिक बाब अल–मान्देब जलमार्गतर्फ हुथी विद्रोहीले तीव्र रूपमा सैन्य प्रगति गरिरहेका बेला सरकारी सुरक्षा बलले क्षतिको विवरण सार्वजनिक गरेको हो ।
अल–जुम्हुरिया टेलिभिजनमार्फत प्रसारित वक्तव्यमा सरकारको ‘नेसनल रेसिस्टन्स फोर्सेस’ले अगस्ट ९ देखि सेप्टेम्बर १० सम्मको अवधिमा उक्त क्षति भएको जनाएको छ । सोही अवधिमा १ हजारभन्दा बढी हुथी सदस्य मारिएको र हजारौँ घाइते भएको दाबी गरिएको छ । यद्यपि, यी तथ्यांकको स्वतन्त्र पुष्टि हुन सकेको छैन ।
वक्तव्यका अनुसार हुथीहरूले मिसाइल, ड्रोन र विस्फोटक डुंगामार्फत आक्रमण गरेपछि लडाइँ सुरु भएको थियो । त्यसपछि संघर्ष लालसागरको हुदैदाह प्रान्तको दक्षिणी भागमा रहेको हायस क्षेत्रदेखि छिमेकी ताइज प्रान्तका विभिन्न मोर्चासम्म फैलिएको थियो ।
सेप्टेम्बर ३ मा हुथीहरूले सुरु गरेको सैन्य आक्रमणका क्रममा सरकारी सुरक्षा बलले ठूलो क्षति व्यहोरेको बताइएको छ । आक्रमणका क्रममा हुथी समूहले हुदैदाह र ताइज प्रान्तका सरकार–नियन्त्रित कैयौँ क्षेत्र कब्जा गरेको दाबी गरिएको छ ।
हुथीहरूले बिहीबार रणनीतिक बन्दरगाह सहर मोचा कब्जा गरेका थिए । त्यसको भोलिपल्ट उनीहरू दक्षिणतर्फ बाब अल–मान्देब क्षेत्रमा अघि बढ्दै जलमार्गको मध्यभागमा रहेको मायुन टापुमा नियन्त्रण कायम गर्न सफल भएका थिए । यससँगै लालसागरलाई अदनको खाडीसँग जोड्ने महत्वपूर्ण समुद्री व्यापारिक मार्गमा उनीहरूको प्रभाव थप बलियो भएको छ ।
अदननजिक पुग्यो द्वन्द्व
हुथी लडाकुहरू दक्षिणतर्फ छिमेकी लाहिज प्रान्ततर्फ अघि बढेका छन् । पछि हटेका सरकारी सुरक्षा बल त्यहाँ पुनः संगठित भएका छन् ।
हुथीहरूको पछिल्लो सैन्य सफलतासँगै यमनको अन्तर्राष्ट्रिय रूपमा मान्यता प्राप्त सरकारको केन्द्र रहेको अदन सहरनजिकै द्वन्द्व पुगेको छ ।
यमनको द्वन्द्व सन् २०१४ को अन्त्यतिर सुरु भएको थियो । त्यतिबेला हुथीहरूले राजधानी साना र उत्तरी यमनका अधिकांश भूभाग कब्जा गरेका थिए । अन्तर्राष्ट्रिय रूपमा मान्यता प्राप्त सरकारको समर्थनमा सन् २०१५ मार्चमा साउदी नेतृत्वको गठबन्धनले यमनमा सैन्य हस्तक्षेप गरेको थियो ।
_nJCneh38vu-1789366512.webp)
