काठमाडौं । प्रमुख प्रतिपक्षी दल नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले वर्तमान सरकार छापा माध्यमलाई सिध्याउने गरी प्रस्तुत भएको आरोप लगाएका छन्।
नेपाल पत्रकार महासंघ र छापा सञ्चारमाध्यम बचाउ अभियानका प्रतिनिधिले ध्यानाकर्षण पत्र बुझाएपछि ओलीले सरकारलाई ‘छापा–मार’ सरकारको संज्ञा दिएका हुन्।
उनले भने, ‘मैले देख्दा त अहिलेको सरकार ‘छापा–मार’ सरकार जस्तो देखिन्छ। ‘छापामार’ एकै ठाउँमा होइन–छापा, मार् सरकार। त्यसो भएपछि सञ्चारमाध्यमलाई अप्ठ्यारो त हुने नै भयो।’
छापा सञ्चारमाध्यमले लोककल्याणकारी विज्ञापन कटौती, बजारमा आएको मन्दी र सरकारी बेवास्ताका कारण भोग्नुपरेको संकटबारे ध्यानाकर्षण गराएपछि ओलीले लोकतन्त्र र प्रेस स्वतन्त्रता एकअर्काका पूरक भएको बताए।
उनले सञ्चारमाध्यममाथिको प्रहार समग्र लोकतन्त्रलाई कमजोर बनाउने प्रयास भएको दाबी गर्दै यस्ता प्रतिगामी कदम लामो समय टिक्न नसक्ने बताए।
इतिहासको उदाहरण दिँदै ओलीले १०४ वर्ष टिकेको राणा शासन, ३० वर्षको पञ्चायत र राजा ज्ञानेन्द्रले २०६१ सालमा गरेको ‘कु’ अन्ततः समाप्त भएको उल्लेख गरे। अहिलेका संकीर्ण तथा स्वतन्त्रताविरोधी कदम पनि धेरै समय टिक्न नसक्ने उनको भनाइ छ।
आन्दोलनरत पत्रकारलाई हरेस नखान आग्रह गर्दै ओलीले महाकवि लक्ष्मीप्रसाद देवकोटाको कवितांश ‘नलडी कोही हुन्न विजेता’ स्मरण गरे। उनले अधिकार प्राप्तिका लागि आफ्नो आवाजलाई निरन्तरता दिन पत्रकारहरूलाई आग्रह गरे।
आफू र आफ्नो पार्टीले दशकौँदेखि अभिव्यक्ति स्वतन्त्रताको पक्षमा लड्दै आएको उल्लेख गर्दै ओलीले छापा माध्यमको रक्षाका लागि एमालेको पूर्ण समर्थन रहेको बताए। छापा माध्यम ऐतिहासिक र तथ्यपूर्ण दस्ताबेज भएकाले डिजिटल युगमा पनि यसको महत्त्व नघट्ने उनको भनाइ छ।
कार्यक्रममा एमाले उपमहासचिव प्रदीप ज्ञवाली, पार्टीका प्रमुख सचेतक तथा सांसदहरूको उपस्थिति थियो। ओलीले संसद् बैठक सुरु हुनेबित्तिकै सञ्चार क्षेत्रका समस्या र लोककल्याणकारी विज्ञापनको विषय पार्टीका तर्फबाट जोडदार रूपमा उठाउने प्रतिबद्धता समेत जनाएका छन्।
