काठमाडौं । नेकपा (एमाले)का नेता प्रदीप ज्ञवालीले गत वर्षको भदौयता लोकतन्त्र कुण्ठित गर्ने प्रयास भइरहेको आरोप लगाएका छन्।
आइतबार (भदौ २८) छापामाध्यमका पत्रकारहरूले पार्टी अध्यक्ष केपी शर्मा ओलीलाई ज्ञापनपत्र बुझाउन आयोजना गरेको कार्यक्रममा बोल्दै ज्ञवालीले राज्यमा भयको वातावरण सिर्जना गर्न खोजिएको बताएका हुन्।
उनले जनताका स्वतन्त्र आवाजमा बन्देज लगाउँदै मानिसलाई आत्मसंयम अर्थात् ‘सेल्फ सेन्सर’ गर्न बाध्य पार्ने प्रयास भइरहेको दाबी गरे।
ज्ञवालीले मौनतामार्फत स्वेच्छाचारी शासनलाई वैधता दिने र त्यसप्रति जनसमर्थन रहेको भाष्य निर्माण गर्न खोजिएको आरोप लगाए। राजनीतिक दललाई निषेध गर्ने प्रयास भइरहेको उनको भनाइ छ।
सामाजिक सञ्जालमा सरकारको आलोचना गर्नेहरूलाई चरित्रहत्या गर्ने तथा महिलालाई बलात्कारको धम्की दिने जस्ता गतिविधिमार्फत समाजलाई मौन बनाउन खोजिएको उनले बताए।
ज्ञवालीले लोककल्याणकारी विज्ञापनलाई राज्यको दयाको विषय बनाउन नहुने धारणा समेत राखे।
प्रकाशित मिति: आइतबार, भदौ २८, २०८३
