काठमाडौं । भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबीच नयाँ दिल्लीमा आयोजित ब्रिक्स शिखर सम्मेलनको साइडलाइनमा द्विपक्षीय भेटवार्ता भएको छ।
शनिबार भएको भेटवार्तामा दुवै नेताले विवादित सीमा मुद्दा समाधान गर्न तथा द्विपक्षीय सम्बन्धलाई थप गति दिन मिलेर काम गर्ने सहमति जनाएका छन्।
भारतको विदेश मन्त्रालयका अनुसार दुवै नेताले सीमा विवादको निष्पक्ष, तर्कसंगत र दुवै पक्षलाई स्वीकार्य समाधान खोज्ने प्रतिबद्धता व्यक्त गरेका छन्। प्रधानमन्त्री मोदीले सीमा क्षेत्रमा शान्ति कायम राख्न विद्यमान सम्झौता तथा समझदारीको पूर्ण पालना गर्नुपर्नेमा जोड दिएका छन्।
भेटमा भारत–चीनबीचको व्यापारिक असन्तुलन र आपूर्ति शृंखलाका समस्याबारे समेत छलफल भएको छ। दुवै नेताले एकअर्काका आर्थिक चासोलाई सम्बोधन गर्दै पूर्वानुमानयोग्य बजार पहुँच सहज बनाउनुपर्नेमा जोड दिएका छन्।
त्यस्तै, सांस्कृतिक, व्यापारिक तथा यातायात सम्पर्क विस्तार गर्ने विषयमा पनि सहमति भएको छ।
भेटवार्तापछि जारी भिडियो सन्देशमा राष्ट्रपति सीले दुई देश फरक भए पनि एकअर्काको सामर्थ्यलाई पूरक बनाउँदै सहयोग र आपसी सफलता हासिल गर्न सक्ने बताएका छन्।
चिनियाँ सरकारी सञ्चारमाध्यम सिन्ह्वाका अनुसार सीले चीनले भारतसँगको सम्बन्धलाई रणनीतिक र दीर्घकालीन दृष्टिकोणबाट हेर्दै आएको बताएका छन्। उनले दुई देशबीच संस्थागत संयन्त्र पुनर्स्थापित भइरहेको र द्विपक्षीय व्यापार नयाँ उचाइमा पुगेको उल्लेख गरेका छन्।
चिनियाँ विदेशमन्त्री वाङ यी र कम्युनिस्ट पार्टीका उच्च अधिकारी काई ची लगायतको प्रतिनिधिमण्डलको नेतृत्व गर्दै राष्ट्रपति सी शनिबार नयाँ दिल्ली पुगेका हुन्।
सन् २०२० मा लद्दाखको विवादित सीमा क्षेत्रमा भएको घातक सैन्य झडपपछि चिसिएको भारत–चीन सम्बन्ध पछिल्लो समय बिस्तारै सुधारोन्मुख छ। हवाई उडान पुनः सञ्चालनको तयारी, भिसा सेवामा सहजता तथा उच्चस्तरीय राजनीतिक सम्पर्कमार्फत दुई देशबीचको सम्बन्ध सुधार्ने प्रयास भइरहेको छ।
यद्यपि, करिब ३ हजार ५०० किलोमिटर लामो वास्तविक नियन्त्रण रेखामा दुवै देशले अझै ठूलो संख्यामा सैनिक तैनाथ गरेका छन्। सीमा विवाद समाधानसँगै सैन्य तैनाथी र आर्थिक तथा जनस्तरीय सम्बन्ध सुधारलाई सँगसँगै अघि बढाउनु दुवै देशका लागि चुनौतीपूर्ण रहेको विश्लेषकहरूले बताएका छन्।
