काठमाडौं । नेकपा (एमाले) को पुनर्गठन कार्यदलको बैठकमा दुईवटा छुट्टाछुट्टै प्रस्ताव पेस भएका छन्।
कार्यदलका संयोजक तथा उपाध्यक्ष रामबहादुर थापा ‘बादल’ र सदस्यसचिव तथा पार्टीका महासचिव शंकर पोखरेलले छुट्टाछुट्टै प्रतिवेदन पेस गरेका हुन्।
बैठकमा दुवै प्रस्ताव वितरण गरी अध्ययनका लागि समय दिइएको छ। प्रस्ताव अध्ययन गरेपछि पुनः बैठक बसेर एउटै प्रतिवेदन तयार गर्ने सहमति भएको छ।
कार्यदलका उपमहासचिव लेखराज भट्टका अनुसार अहिलेका दुवै दस्तावेज प्रस्तावका रूपमा रहेका छन्। कार्यदलले पारित गरेपछि मात्रै त्यसलाई औपचारिक प्रतिवेदनका रूपमा सचिवालयमा बुझाइनेछ।
गएको जेठ १० गते बसेको सचिवालय बैठकले गठन गरेको कार्यदललाई तल्लो तहबाट आएका सुझाव समेटेर प्रतिवेदन तयार गरी सचिवालयमा बुझाउने जिम्मेवारी दिइएको थियो।
कार्यदलले प्रतिवेदन लेखनको जिम्मेवारी महासचिव पोखरेललाई दिएको थियो। पोखरेलले तयार पारेको मस्यौदामा पार्टी अध्यक्ष केपी शर्मा ओलीले पदबाट हट्नुपर्ने विषय समेटिएको बताइएको छ।
त्यसको प्रतिवाद गर्दै संयोजक बादलले ओलीको बचाउमा छुट्टै प्रस्ताव तयार पारेका हुन्।
कार्यदलका सदस्यहरूले दुवै प्रस्तावमाथि अध्ययन गरेपछि भोलिदेखि आवासीय रूपमा छलफल गरी एउटै प्रतिवेदन तयार गर्ने निर्णय भएको प्रचार विभाग प्रमुख निरज आचार्यले जानकारी दिए।
प्रकाशित मिति: शुक्रबार, भदौ २६, २०८३
-1789109208-1789117375.jpeg)
