काठमाडौं । चीनका राष्ट्रपति सी चिनफिङ यसै साताको अन्त्यमा नयाँ दिल्लीमा आयोजना हुने १८औँ ब्रिक्स शिखर सम्मेलनमा सहभागी हुन भारत जाने भएका छन्।
चिनियाँ विदेश मन्त्रालयले सामाजिक सञ्जाल ‘एक्स’मार्फत राष्ट्रपति सी सेप्टेम्बर १२ देखि १३ सम्म नयाँ दिल्लीमा हुने ब्रिक्स शिखर सम्मेलनमा सहभागी हुने जनाएको छ। भारतीय प्रधानमन्त्री नरेन्द्र मोदीको निमन्त्रणामा सी भारत जान लागेका हुन्।
सन् २०१९ मा चेन्नईनजिकैको मामल्लापुरममा प्रधानमन्त्री मोदीसँग भएको अनौपचारिक शिखर सम्मेलनपछि राष्ट्रपति सीको यो पहिलो भारत भ्रमण हुनेछ।
सीको भ्रमणलाई कूटनीतिक रूपमा महत्वपूर्ण मानिएको छ। यस भ्रमणले भारत र चीनबीचको सम्बन्धलाई स्थिर बनाउने प्रयास तथा ब्रिक्सभित्रको सहकार्यमा समेत प्रभाव पार्ने अपेक्षा गरिएको छ।
ब्रिक्स शिखर सम्मेलनका क्रममा प्रधानमन्त्री मोदीले रुसी राष्ट्रपति भ्लादिमिर पुटिन र इरानी राष्ट्रपति मसुद पेजेस्कियानसँग द्विपक्षीय वार्ता गर्ने अपेक्षा गरिएको छ।
यसैबीच, शिखर सम्मेलनलाई लक्षित गर्दै दिल्ली प्रहरीले करिब १५ हजार सुरक्षाकर्मी परिचालन गर्ने तयारी गरेको छ। सम्मेलनमा सहभागी हुने विदेशी राष्ट्र तथा सरकार प्रमुखको सुरक्षा र नयाँ दिल्लीका प्रमुख क्षेत्रको सुरक्षालाई ध्यानमा राख्दै ठूलो संख्यामा सुरक्षाकर्मी परिचालन गर्न लागिएको हो।
प्रकाशित मिति: शुक्रबार, भदौ २६, २०८३
