काठमाडौं । विसं २०८२ चैत १३ गते गठन भएको बालेन्द्र शाह नेतृत्वको सरकारबाट दोस्रो मन्त्री बाहिरिएकी छन्। उद्योग, वाणिज्य तथा आपूर्तिमन्त्री गौरीकुमारी यादवले बिहीबार (भदौ २५) राजीनामा दिएकी हुन्।
एलपी ग्यासको अभाव व्यवस्थापन गर्न नसकेको तथा त्यसबारे दिएको विवादित अभिव्यक्तिपछि मन्त्री यादवमाथि व्यवसायीहरूले आपत्ति जनाएका थिए। उनले ग्यास अभाव उद्योगी व्यवसायीकै कारण भएको बताउँदै ‘उद्योगी व्यवसायीको पाता नफर्काएसम्म ग्यासको आपूर्ति सहज हुँदैन’ भनेकी थिइन्।
यसअघि पनि केही निर्णयलाई लिएर प्रधानमन्त्री शाह यादवसँग असन्तुष्ट रहेको बताइएको थियो। नेपाल आयल निगमले पेट्रोलियम पदार्थको मूल्य घटाउनुअघि मन्त्रालयमै पेट्रोलियम व्यवसायीहरूसँग भेट गरेको विषयमा प्रधानमन्त्री असन्तुष्ट रहेको स्रोतको दाबी छ।
प्रधानमन्त्रीले प्रहरी प्रमुखलाई फोन गरेर मन्त्री यादवलाई पक्राउ गर्न आदेश दिएको र प्रहरी प्रमुखले मन्त्रीलाई सिधै पक्राउ गर्न नमिल्ने बताएपछि उक्त प्रक्रिया रोकिएको समाचारहरू बाहिरिएका थिए।
विभागीय मन्त्रालयको नेतृत्वमा रहेर ग्यास आपूर्ति व्यवस्थापन गर्न नसकेको भन्दै समस्या समाधान गर्न नसकेमा ‘असक्षम’ ठहर गरी बर्खास्त गर्ने तयारी भएपछि यादवले राजीनामा दिएको स्रोतले जनाएको छ।
प्रधानमन्त्री कार्यालय स्रोतका अनुसार यादवले राजीनामा नदिएको भए प्रधानमन्त्री शाहले उनलाई बर्खास्त गर्ने तयारी गरेका थिए। यादव बालेन सरकारबाट बाहिरिने दोस्रो मन्त्री बनेकी छन्।
यसअघि उद्योग, वाणिज्य तथा आपूर्ति मन्त्रालयको समेत जिम्मेवारी सम्हालेका श्रम, रोजगार तथा सामाजिक सुरक्षामन्त्री दीपक साहलाई प्रधानमन्त्री शाहले बर्खास्त गरेका थिए। आफ्नी श्रीमती जुनू श्रेष्ठलाई स्वास्थ्य बीमा बोर्डको सदस्य नियुक्त गर्न प्रभाव पारेको आरोपमा उनलाई हटाइएको थियो।
श्रीमती श्रेष्ठ स्वास्थ्य बीमा बोर्डको बैठकमा लगातार अनुपस्थित भएर रिक्त भएको पदमा निरन्तरता दिन दबाब दिएको आरोप साहमाथि लागेको थियो। पछि स्वास्थ्यमन्त्री निशा मेहताले श्रेष्ठलाई नयाँ सदस्य नियुक्त गरेकी थिइन्। त्यस विषयमा सामाजिक सञ्जालमा विरोध भएपछि राष्ट्रिय स्वतन्त्र पार्टीका सभापति रवि लामिछानेले प्रधानमन्त्री शाहलाई पत्र लेखेर श्रेष्ठलाई पदमुक्त गर्न माग गरेका थिए। त्यसपछि प्रधानमन्त्री शाहले साहलाई पदमुक्त गरेका थिए।
चैत १३ गते शपथ लिएका साह १३ दिनपछि चैत २६ गते पदमुक्त भएका थिए। साहलाई हटाएपछि श्रममन्त्रीमा रामजी यादव र उद्योग, वाणिज्य तथा आपूर्तिमन्त्रीमा गौरीकुमारी यादव नियुक्त भएका थिए। चैत २७ गते नियुक्त भएकी गौरीकुमारीले १५३ दिनपछि राजीनामा दिएकी हुन्। उनी राजीनामापछि मन्त्रालयबाट रुँदै बाहिरिएकी थिइन्।
गृहमन्त्री गुरुङको पुनर्नियुक्ति
गृहमन्त्री सुधन गुरुङ पनि सम्पत्ति विवरण सार्वजनिक भएपछि विवादमा तानिएका थिए। विवाद बढेपछि उनले पदबाट राजीनामा दिएका थिए।
गुरुङमाथि छानबिन गर्न समिति गठन गरिएको थियो। समितिले सम्पत्ति आर्जनको विषयमा गुरुङको भन्दा प्रणालीगत समस्या देखाउँदै प्रतिवेदन बुझाएको भन्दै प्रधानमन्त्री शाहले उनलाई पुनः गृहमन्त्री नियुक्त गरेका हुन्।
गुरुङले वैशाख ९ गते राजीनामा दिएका थिए भने जेठ २६ गते पुनः गृहमन्त्री नियुक्त भएका थिए। छानबिन समितिले उनलाई सफाइ दिएको भनिए पनि प्रतिवेदन भने सार्वजनिक गरिएको छैन।
प्रकाशित मिति: बिहीबार, भदौ २५, २०८३
