काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेले विपत्तिको समयमा सरकारको भूमिकालाई सत्ता र प्रतिपक्षको परम्परागत दृष्टिकोणबाट हेर्न नहुने बताएका छन् ।
प्रतिनिधि सभाको बैठकमा बोल्दै लामिछानेले विपत्तिको सुरुवाती घण्टामै सरकारले राज्यका सम्पूर्ण संयन्त्र परिचालन गरी उद्धार, उपचार र राहतको काम थालेको बताए ।
सरकारको तत्परतामाथि प्रश्न गर्ने आफूले ठाउँ नदेखेको भन्दै उनले घाइतेको उद्धार तथा उपचार, विस्थापित परिवारका लागि अस्थायी बसोबास र खाद्यान्न व्यवस्थापनमा समेत सरकारले तत्परता देखाएको दाबी गरे ।
‘कतिपय ठाउँमा बाटो छैन, सञ्चार छैन, मौसम अनुकूल छैन । तर ती सबै कठिनाइका बीच पनि उद्धार तथा राहतकर्मी प्रभावित नागरिकसम्म पुगेका छन्,’ उनले भने ।
प्रभावित क्षेत्रको अवस्था र क्षतिको गम्भीरतालाई ध्यानमा राख्दै बाढी प्रभावित स्थानीय तहलाई विपद् संकटग्रस्त क्षेत्र घोषणा गरी उद्धार, राहत र पुनःस्थापनालाई प्राथमिकता दिइएको उनले बताए ।
क्षतिग्रस्त सडक, पुल, विद्युत् तथा खानेपानीलगायत अत्यावश्यक पूर्वाधार पुनः सञ्चालनमा ल्याउने कामसमेत अघि बढिरहेको उनको भनाइ थियो ।
‘राज्य कहाँ छ ?’ भन्ने प्रश्न गर्नेहरूलाई जवाफ दिँदै लामिछानेले भने, ‘राज्य यतिबेला त्यो कहालीलाग्दो भग्नावशेष र सुरुङभित्र आफ्ना नागरिकको प्राण खोजिरहेको छ ।’
सर्वस्व गुमाएर खुला आकाशमुनि पुगेका नागरिकको छाहरी बन्न राज्य रातदिन खटिरहेको उनले बताए । भेलले बगाएका सडक र चुँडिएका पुलसँगै विपद्ले टुटाएको नागरिकको भरोसा जोड्ने प्रयासमा समेत सरकार केन्द्रित रहेको उनको भनाइ थियो ।
प्रकाशित मिति: बुधबार, भदौ २४, २०८३
-1784890653-1788942355.jpg)
