भक्तपुर । नेकपा (एमाले)का सचिव एवं पूर्वमन्त्री महेश बस्नेतले जेनजी आन्दोलनका नाममा आफ्नो निजी घर जलाइएको भन्दै आक्रोश व्यक्त गरेका छन् । सूर्यविनायक–७, गुण्डुस्थित जलाइएको घरको प्राङ्गणमा बुधबार आयोजित भण्डाफोर तथा विरोध कार्यक्रमलाई सम्बोधन गर्दै बस्नेतले आफ्नो परिवारमाथि भएको घटनामा राज्यले न्याय नदिएको आरोप लगाए ।
आफ्नो घरसँगै बुवाआमाको पसिनाको कमाइ तथा छोराछोरीको बाल्यकालका सम्झनासमेत जलाइएको उल्लेख गर्दै उनले बुवाआमा र श्रीमतीलाई समेत जिउँदै जलाउने प्रयास भएको स्मरण गरे ।
‘त्यो क्रुर घटनापछि मेरी आमा एन्जाइटीको बिरामी हुनुभयो । बुवाको दुईपटक मुटुको भल्भ फेर्नुपर्यो,’ उनले भने, ‘योजनाबद्ध रूपमा हाम्रो परिवारलाई आर्थिक, भौतिक, मानसिक र भावनात्मक रूपमा तहसनहस पारियो ।’
आफूहरू एक वर्षदेखि डेरामा बसिरहेको बताउँदै बस्नेतले निजी सम्पत्ति जलाउने व्यक्तिहरूविरुद्ध प्रमाणसहित उजुरी दिँदा पनि कारबाही नभएको गुनासो गरे ।
घर जलाउनेहरूको हिसाबकिताब राखिरहेको बताउँदै उनले राज्यले न्याय नदिए उनीहरूको घर पनि त्यसैगरी जलाउन बाध्य हुने चेतावनी दिए ।
गत वर्ष भदौ २३ र २४ गते भएको जेनजी आन्दोलनलाई बस्नेतले ‘साम्राज्यवादी शक्तिको इशारामा देशघाती समूहले गरेको विध्वंस’को संज्ञा दिए । राज्यका तीनवटै अंगमाथि एकैसाथ प्रहार गरिएको दाबी गर्दै उनले संसद् भवन, सिंहदरबार र सर्वोच्च अदालतमा भएको आगजनीलाई देशद्रोहको संज्ञा दिए ।
उनले नेपाली सेनालगायत सुरक्षा निकायको भूमिकामाथि समेत अनुसन्धान हुनुपर्ने बताए ।
दुई दिनको घटनामा राज्यको ४४ अर्ब रुपैयाँ तथा निजी क्षेत्रको साढे ३३ अर्ब रुपैयाँ बराबरको क्षति भएको दाबी गर्दै बस्नेतले उक्त समूहकै व्यक्तिहरू अहिले सरकारमा रहेको आरोप लगाए । वर्तमान सरकार रहुन्जेल राष्ट्रघात भइरहने उनको भनाइ थियो ।
सिंहदरबार र संसद् भवन जलाउने तथा गोली चलाउने काम एउटै समूहले गरेको आरोप लगाउँदै उनले देशमा भएको नियोजित षड्यन्त्रमा वर्तमान प्रधानमन्त्री बालेन्द्र शाह, गृहमन्त्री सुधन गुरुङ र राष्ट्रिय स्वतन्त्र पार्टीका सभापति रवि लामिछाने लगायतको प्रमुख भूमिका रहेको आरोप लगाए ।
‘हामीले यथेष्ट प्रमाण राखेका छौं । उनीहरूलाई यसबापत उन्मुक्ति हुने छैन,’ उनले भने ।
बस्नेतले संयुक्त राष्ट्रसंघको कार्यक्रमबाट फर्किएलगत्तै प्रधानमन्त्री बालेन्द्र शाहलाई राजीनामा दिन आग्रह गरे । वर्तमान सरकार रहुन्जेल देशको हित नहुने उनको दाबी थियो ।
जेनजी आन्दोलनका क्रममा ६ जना प्रहरीको हत्या भएको उल्लेख गर्दै उनले घटनामा संलग्न दोषीमाथि कडा कानुनी कारबाही हुनुपर्ने माग गरे ।
यस्तै, सरकारले राहत कोषमा १२ अर्ब रुपैयाँ कब्जा गरेको आरोप लगाउँदै बस्नेतले एमालेले आफ्ना कार्यकर्ताको गाँस कटाएर संकलन गरेको १ करोड २० लाख रुपैयाँ बाढीपीडितलाई प्रत्यक्ष वितरण गरिएको बताए ।
स्थानीय तहले जग्गा उपलब्ध गराए एमालेले बाढीपीडितका लागि ५०० वटा अस्थायी बासस्थान तथा घर निर्माण गरिदिने उनको भनाइ थियो ।
प्रकाशित मिति: बुधबार, भदौ २४, २०८३
-1784890653-1788942355.jpg)
