स्टेट ग्रिडलाई उद्धृत गर्दै चिनियाँ समाचार संस्था सिन्ह्वाले जनाएअनुसार, पहिरो र निरन्तर खसिरहेका ढुंगाका जोखिमबीच अग्रपंक्तिमा खटिएका प्राविधिक कर्मचारीले चौबीसै घण्टा काम गरेर अस्थायी विद्युत् लाइन सञ्चालनमा ल्याएका हुन् ।
बिहीबार राति ८ बजेसम्म शिगात्सेस्थित केरुङ नाका आसपासको मुख्य विपद् प्रभावित क्षेत्रमा अस्थायी विद्युत् आपूर्ति पूर्ण रूपमा पुनःस्थापित गरिएको जनाइएको छ । विद्युत् सेवा पुनः सञ्चालनमा आएपछि जारी खोज तथा उद्धार कार्यमा आवश्यक विद्युत् सुविधा सुनिश्चित भएको चिनियाँ सञ्चारमाध्यमले जनाएका छन् ।
अगस्ट २६ मा आएको भीषण लेदो–पहिरोले ग्यारोङ नाकासहित आसपासका क्षेत्रमा सडक, विद्युत् तथा सञ्चार संरचनामा क्षति पुर्याएको थियो । त्यसपछि प्राविधिक टोलीले क्षतिग्रस्त विद्युत् लाइन मर्मत तथा पुनःस्थापनाको काम गरिरहेका थिए ।
यसअघि केरुङ नाका जोड्ने मुख्य स्थलगत मार्ग राष्ट्रिय राजमार्ग जी–२१६ बुधबार बिहान पूर्ण रूपमा सञ्चालनमा आएको थियो । सडक खुलेपछि उद्धारकर्मी, राहत सामग्री तथा भारी उपकरण प्रभावित क्षेत्रमा पुर्याउन सहज भएको छ ।
यस्तै, प्राविधिक टोलीले फाइबर–अप्टिक केबल बिछ्याउने, प्राविधिक समस्या समाधान गर्ने, टेलिकम बेस स्टेसन पुनः सञ्चालन गर्ने तथा सिग्नल क्षमता बढाउने काममार्फत सञ्चार सेवा पनि पुनःस्थापित गरेको जनाइएको छ ।
यससँगै केरुङ नाका आसपासको विपद् प्रभावित क्षेत्रमा सडक, विद्युत् र सञ्चार सेवा क्रमशः पुनःस्थापित हुँदै गएको चिनियाँ सञ्चारमाध्यमले जनाएका छन् ।
