काठमाडौं । उज्यालो पार्टी नेपालका अध्यक्ष तथा नेपाल विद्युत् प्राधिकरणका पूर्वकार्यकारी निर्देशक कुलमान घिसिङले प्रधानमन्त्री बालेन्द्र शाह (बालेन)लाई भेटेर विपद् व्यवस्थापनमा देखिएका कमजोरीलाई उद्धार, राहत र पुनर्स्थापनामार्फत सम्बोधन गर्न सुझाव दिएका छन् ।
प्रधानमन्त्री तथा मन्त्रिपरिषद्को कार्यालय सिंहदरबारमा भएको भेटमा घिसिङ पार्टीका पदाधिकारीसहित पुगेका थिए । भेटमा उनले विपत्तिको समयमा केही कमजोरी देखिनु स्वाभाविक भए पनि त्यसलाई सुधार गर्दै अघि बढ्नुपर्ने बताए ।
“धेरै ठूलो विपत्ति भएकाले ल्याप्सेस भएकै छन् । त्यसलाई सम्बोधन गर्दै अघि बढ्नुको विकल्प छैन,” घिसिङले भने ।
घिसिङले बाढीका कारण विभिन्न आयोजनाका सुरुङमा फसेकाहरूको उद्धारलाई सरकारले पहिलो प्राथमिकतामा राख्नुपर्ने सुझाव दिए । उनले तत्काल फिल्डमा पुगेर उपलब्ध स्रोतसाधन परिचालन गर्नुका साथै आवश्यक परे बाह्य स्रोतसाधन र दक्ष जनशक्ति ल्याएर उद्धार गर्नुपर्ने बताए ।
“अहिलेको विपद्को अवस्थामा हामीले फिल्डमा भिजिट गरेर हामीसँग भएको रिसोर्स र बाहिरबाट थप रिसोर्स तत्काल परिचालन गरेर सुरुङमा फसेकाहरूको उद्धारलाई प्राथमिकता दिनुपर्छ भन्यौँ,” उनले भने ।
प्रधानमन्त्री शाहले पनि बाढीमा फसेकाहरूको उद्धारबारे चासो देखाएको र स्वदेशी तथा विदेशी दक्ष जनशक्ति ल्याउन सरकार तयार रहेको बताएको घिसिङले जानकारी दिए ।
भेटमा शव व्यवस्थापनमा भएको ढिलाइका कारण नागरिकमा बढेको आक्रोशबारे पनि प्रधानमन्त्रीको ध्यानाकर्षण गराइएको उनले बताए । फिल्डमा जाँदा स्थानीय तहसँगै आम नागरिकबाट समेत शव व्यवस्थापन प्रभावकारी नभएको गुनासो आएको उनको भनाइ थियो ।
यस्तै, होल्डिङ सेन्टरमा राखिएकाहरूको सामाजिक तथा स्वास्थ्य सुरक्षाको विषयमा पनि घिसिङले प्रधानमन्त्रीसँग छलफल गरेका थिए । प्रधानमन्त्रीले उक्त विषयमा सरकार गम्भीर भएर काम गरिरहेको बताएको उनले जानकारी दिए ।
बालबालिकाको अवस्था तथा विद्यार्थीको पढाइ प्रभावित हुन नदिन आवश्यक व्यवस्थापन गर्नुपर्ने विषयमा पनि घिसिङले चासो राखेका थिए । उनका अनुसार प्रधानमन्त्रीले बालबालिकालाई काठमाडौंमा ल्याएर राख्ने तयारीबारे जानकारी दिएका थिए ।
घिसिङले सडक पुगेका स्थानसम्म सरकारी स्तरबाट राहत पुगिरहेको भए पनि त्रिशूली नदीपारिका क्षेत्रमा राहत वितरण व्यवस्थित हुन नसकेको बताए । विभिन्न संघसंस्था तथा निकायले समेत राहत वितरण गरिरहेकाले त्यसलाई समन्वय र व्यवस्थापन गर्न सरकारको ध्यान जानुपर्ने उनको सुझाव छ ।
उनले बेत्रावतीसम्म तत्काल सहज सडक पहुँच बनाउनुका साथै बेलिब्रिजमार्फत यातायातको पहुँच विस्तार गर्न पनि सुझाव दिएका छन् । यातायात पहुँच विस्तार भए विपद् व्यवस्थापनसँगै उद्धार, राहत र पुनर्स्थापनाका कामसमेत सहज हुने उनको भनाइ छ ।
प्रकाशित मिति: बिहीबार, भदौ १८, २०८३
-1788432025.jpg)