काठमाडौं । सिरियाको दक्षिण–पश्चिमी प्रान्त कुनेत्रास्थित अबु कबैस हिल क्षेत्रमा सोमबार इजरायली सैन्य टोली प्रवेश गरेको सिरियाली सरकारी सञ्चारमाध्यमले जनाएका छन्।
सरकारी टेलिभिजन अल–इखबारियाका अनुसार उक्त सैन्य गस्तीमा दुईवटा ट्याङ्कसहित सैनिकहरू बोकेका विभिन्न सैन्य सवारीसाधन सहभागी थिए।
पछिल्ला केही दिनमा इजरायली सेना सिरियाली भूभागमा प्रवेश गरेको यो दोस्रो घटना भएको बताइएको छ। यसअघि आइतबार पनि इजरायली सैनिकहरू दुईवटा ट्याङ्क र सैन्य टोलीसहित कुनेत्राकै पूर्वी समदानिया गाउँमा प्रवेश गरेको सिरियाली सञ्चारमाध्यमले जनाएका थिए।
आइतबारको घटनाका क्रममा इजरायली सेनाले गाउँका कृषि क्षेत्रमा खानतलासी तथा सैन्य कारबाही गरेको बताइएको छ। त्यस क्रममा गोली चलेको आवाज सुनिनुका साथै सुरक्षा जाँचसमेत गरिएको समाचारमा उल्लेख छ।
सिरियाले इजरायलमाथि सन् १९७४ को सैन्य विच्छेदन सम्झौता उल्लंघन गरेको आरोप लगाउँदै आएको छ। दक्षिणी सिरियामा इजरायली सेनाले पटक–पटक प्रवेश गर्ने, छापा मार्ने, स्थानीयलाई नियन्त्रणमा लिने, जमिन खाली गराउने तथा गोलाबारी गर्ने गरेको सिरियाको दाबी छ।
कुनेत्रा क्षेत्रमा पछिल्ला महिनाहरूमा इजरायली सैन्य गतिविधि बढेको विभिन्न रिपोर्टहरूले पनि देखाएका छन्।
प्रकाशित मिति: मंगलबार, साउन २६, २०८३
