धनगढी । नेकपा (एमाले) सुदूरपश्चिम प्रदेश संसदीय दलले भोटेकोशी र त्रिशूली नदी क्षेत्रमा आएको बाढीबाट प्रभावित तथा पीडितलाई सहयोग गर्ने निर्णय गरेको छ।
संसदीय दलका नेता राजेन्द्र सिंह रावलको अध्यक्षतामा तथा पार्टीका उपमहासचिव लेखराज भट्टको विशेष उपस्थितिमा बुधबार बसेको बैठकले बाढीमा ज्यान गुमाएकाहरूप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेको छ।
बैठकले पार्टीको केन्द्रीय सर्कुलरअनुसार सुदूरपश्चिम प्रदेशसभाका प्रत्येक एमाले सांसदको मासिक तलबबाट सात दिन बराबरको १३ हजार १८३ रुपैयाँ कट्टा गरी पार्टीको विपद् राहत कोषमा जम्मा गर्ने सर्वसम्मत निर्णय गरेको छ। साथै, बाढीपीडितलाई सहयोग गर्न सर्वसाधारणलाई आह्वान गर्ने निर्णयसमेत गरिएको छ।
त्यसैगरी, प्रदेश कमिटीले मन्त्री, राज्यमन्त्री तथा प्रदेशसभा सदस्यका सचिवालयमा कर्मचारी तथा सहयोगी नियुक्त गर्दा आफन्त तथा नातागोतासँग प्रत्यक्ष सम्बन्ध भएका र पार्टी गतिविधिमा संलग्न नरहेका व्यक्तिलाई नियुक्त नगर्न दिएको सुझावबारे बैठकले चासो व्यक्त गरेको छ।
बैठकले प्रदेश कमिटीले निर्धारण गरेको मापदण्डअनुसार सचिवालयमा कर्मचारी तथा सहयोगी नियुक्त गरिएको वा नगरिएको विषयमा स्पष्ट विवरण प्रदेश कमिटी र संसदीय दलको कार्यालयमा उपलब्ध गराउन सम्बन्धित पक्षलाई आग्रह गर्ने निर्णय गरेको छ।
बैठकमा दलका उपनेता सन्तोष शर्मा थापा, प्रमुख सचेतक सुरेन्द्रबहादुर पाल, सचेतक निर्मलादेवी साउदलगायत प्रदेशसभा सदस्यहरूको सहभागिता थियो।
बैठकमा एमाले उपमहासचिव तथा सुदूरपश्चिम प्रदेश इन्चार्ज लेखराज भट्ट, पार्टी इन्चार्ज तथा केन्द्रीय सदस्य दामोदर भण्डारी र सुदूरपश्चिम प्रदेश कमिटीका अध्यक्ष कृष्णप्रसाद जैसीको समेत विशेष उपस्थिति रहेको थियो
प्रकाशित मिति: बुधबार, भदौ १७, २०८३
