११ माघ, काठमाडौँ । इराकको मोसुलबाट हालसम्म एक लाख एकसट्ठी हजार भन्दा धेरै व्यक्ति आन्तरिक रुपमा विस्थापित भएका छन् । मोसुलमा भइरहेको लडाईका कारण उनीहरु विस्थापित भएका संयुक्त राष्ट्रसंघका प्रवक्ता स्टेफन डुजर्रीकले सोमबार जानकारी दिनुभयो । विस्थापितहरुलाई मानतावादी संस्थाहरुले राहतस्वरुप खाना, पानी र शरिरको सफाइसम्बन्धी सामग्रीहरु वितरण गरेका छन् ।
विस्थापित भएका झण्डै चार हजार पाँच सय जनालाई आइतबार ती राहत सामग्रीहरु वितरण गरिएको स्टेफनले बताउनुभयो । पछिल्लो हप्ता मात्रै पूर्वीमोसुलमा बस्दै आएका झण्डै ५६ हजार एक सय जनालाई राष्ट्रसंघका साझेदारहरुले सहयोग सामग्रीहरु बाँडेका थिए । इराकको सुरक्षा बलले मोसुलबाट इस्लामिक स्टेट (आइएस)लाई हटाउनका लागि कडा प्रयास गरिरहेका छन् । मोसुलको पूर्वी क्षेत्र सन् २०१४ को जुनदेखि आइएसको नियन्त्रणमा रहेको छ । मोसुल इराकको राजधानी बगदाददेखि चार सय किलोमिटर टाढा पर्दछ ।
प्रकाशित मिति: सोमबार, माघ १०, २०७३
-1732776560.jpg)
