काठमाडौं । उपत्यकाका स्थानीय तहहरुले गुर्जो रोपण अभियानलाई तीव्रता दिएका छन् । मानव शरीरमा रोग प्रतिरोधी क्षमता वृद्धि गर्न सहयोग गर्ने वनस्पति गुर्जो रोपणका लागि वितरण अभियान तीव्र पारिएको हो ।
गुर्जोका बिरुवा निःशुल्क वितरण गर्दै आउनुभएका आन्तरिक राजश्व कार्यालय लहानका प्रमुख कमलबहादुर राजलवटले सोमबार मात्रै राजधानीका ३ स्थानीय तह र त्रिभुवन विश्वविद्यालयका ४ विभागमा गुर्जोका बिरुवा गरेका छन् । अभियानकर्मी राजलवटले बूढानीलकण्ठ नगरपालिकालाई २ सय, महालक्ष्मी नगरपालिकालाई २ सय र सूर्यविनायक नगरपालिकाको वडा नम्बर ५ लाई ३ सय गुर्जोका बिरुवा हस्तान्तरण गरिएको जानकारी दिए ।
यसैगरी कीर्तिपुरस्थित त्रिभुवन विश्वविद्यालयको वनस्पति, जीव विज्ञानलगायत विभागका लागि ८ सय बिरुवा वितरण गरिएको पनि उहाँको भनाइ छ । ललितपुरको ठैब क्षेत्रका लागि पनि ३ सय बिरुवा रोपणका लागि हस्तान्तरण गरिएको राजलवटले वताए ।
बूढानीलकण्ठ नगरपालिकामा कोरोना भाइरसको संक्रमण भई आइसोलेसन कक्षमा बसेका ३५ जनालाई नगर प्रमुख उद्धवप्रसाद खरेलमार्फत् गुर्जोबाट बनेको ३५ केजी चियासमेत हस्तान्तरण गरिएको छ । कोरोना पोजेटिभ भएकालाई फेरि गुर्जो दिने उनको प्रतिबद्धता छ ।
ललितपुरको महालक्ष्मी नगरपालिकामा समेत आइसोलेसन कक्षमा बसेकाका लागि गुर्जोको चिया हस्तान्तरण गरिएको छ । महालक्ष्मीका नगर प्रमुखसमेत कोरोना संक्रमण भई आइसोलेसन कक्षमा बसेका उनलाई पनि नगरपालिकामार्फत् नियमित सेवनका लागि छुट्टै गुर्जोको चिया हस्तान्तरण गरिएको हो ।
उपत्यकामा १ घर १ गुर्जोको बिरुवा रोप्नुपर्ने गरी अभियानका रूपमा अघि बढाइएको छ । गुर्जो रोपण अभियानमा हाल उपत्यकामा क्रियाशील बागमती, रुद्रमती, विष्णुमती, चक्रपथलगायत क्षेत्रका सफाइ अभियानकर्मी पनि संलग्न छन् । उपत्यकाका सबै नदी किनारमा गुर्जोको बिरुवा रोप्ने अभियानसमेत शुरु गरिएको छ । नदी किनारका प्रत्येक घरमा गुर्जो रोपण अभियान जारी छ ।
गुर्जो मधुमेह, उच्च रक्तचाप, मौसमी रुघाखोकीलगायत रोगका लागि औषधीको रूपमा प्रयोगमा ल्याइन्छ । गर्भवती महिला र पाँच वर्षमुनिका बालबालिकाका लागि भने गुर्जो सेवन गराउन हुँदैन । लहानस्थित सरकारी निवास क्षेत्रमा हुर्काइएका करिब ७५ हजार गुर्जोका बिरुवा हालसम्म देशका विभिन्न भागमा रोपणका लागि हस्तान्तरण गरिएको छ ।
गुर्जो रोपण अभियानलाई देशव्यापी बनाउन राष्ट्रिय योजना आयोगका सहसचिव एवं योग शिक्षक किशोर जोशी, जीवन विज्ञानका योग प्रशिक्षक रामप्रसाद पन्थी लगायत अभियानकर्मी पनि राजलवटसँगै जुट्नुभएको छ । आयुर्वेद शास्त्रको ‘यस्य देशस्य यो जन्तोः तस्य तद् औषधं हितम्’ अर्थात् जुन स्थानमा मानिस जन्मन्छन् तिनलाई औषधीको काम गर्ने वनस्पति त्यहीँ हुन्छ भन्ने भावना अनुसार देशव्यापी रूपमा गुर्जो रोपण अभियानलाई तीव्र बनाइएको हो ।
प्रकाशित मिति: मंगलबार, असोज १३, २०७७
-1732776560.jpg)
