काठमाडौं । नेकपा (एमाले) ले बाढी–पहिरो प्रभावित क्षेत्रमा भइरहेको उद्धार तथा राहत कार्यको स्थलगत अनुगमन र सूक्ष्म निगरानी गर्न विशेष संसदीय समिति गठनको माग गर्ने निर्णय गरेको छ ।
सिंहदरबारमा मंगलबार बसेको एमाले संसदीय दलको बैठकले बुधबारदेखि सुरु हुने प्रतिनिधिसभा बैठकमा संसदीय दलका नेताले सम्बोधन गर्ने र विशेष संसदीय समिति गठनका लागि माग गर्ने निर्णय गरेको एमाले संसदीय दलका प्रमुख सचेतक ऐन महरले जानकारी दिए ।
बैठकले बाढी–पहिरोमा परी ज्यान गुमाउनेहरूप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरेको छ । साथै बेपत्ताहरूको तत्काल खोजी तथा उद्धार गर्न सरकारसँग माग गरेको महरले बताए ।
एमालेले आफ्ना प्रत्येक सांसदको १५ दिनको पारिश्रमिक राहत कोषमा जम्मा गर्ने निर्णयसमेत गरेको छ ।
प्रमुख सचेतक महरले बाढीपछिको उद्धार कार्य प्रभावकारी हुन नसक्दा नागरिकको ज्यान जोगाउने अवसर गुमेको आरोप लगाए ।
उनका अनुसार एउटै घरबाट २२ भन्दा बढी शव फेला पर्नु तथा समयमै उद्धार हुन नसक्दा ५ देखि ७ दिनपछि मात्रै शव भेटिनुले सरकारी संयन्त्रको कमजोरी देखाएको छ ।
एमालेले गठन गर्न माग गरेको विशेष संसदीय समितिले उद्धार तथा राहत कार्यको स्थलगत अनुगमनसँगै सरकारलाई आवश्यक समन्वय र सहजीकरण गर्ने जनाएको छ।
प्रकाशित मिति: मंगलबार, भदौ १६, २०८३
-1787133994.jpg)
