काठमाडाैं । नेपालमा काेराेना भाइरसकाे संक्रमणका कारण थप ३ जनाकाे मृत्यु भएकाे छ। मृत्यु हुनेमा बाँके, पर्सा र माेरङका १-१ जना छन् ।
बाँकेमा १ जना कोरोना संक्रमित पुरुषको मृत्यु भएको छ । नेपालगन्ज उपमहानगरपालिका–९ बाँकेका ५९ वर्षीय पुरुषको नेपालगन्ज मेडिकल कलेज कोहलपुरमा आइतबार राति ८:३० बजे मृत्यु भएको हो ।
जिल्ला कोरोना फोकल पर्सन नरेश श्रेष्ठका अनुसार स्वास्थ्यमा समस्या आएपछि भदाै १२ गते अस्पताल आएका उनी मधुमेह र मुटु रोगी थिए । काेराेनाकाे शंका लागेर स्वाब परीक्षण गर्दा भदौ १५ गते उनलाई कोरोना संक्रमण पुष्टि भएको थियो।
हाेटल आइसाेलेसनमा बस्दै आएका उनको स्वास्थ्य अवस्था बिग्रिँदै गएपछि भदौ १८ गते दिउँसो अस्पतालमा उपचारका लागि सारिएको थियो।
यसैगरी वीरगन्जस्थित नारायणी अस्पतालमा उपचाररत कोरोना संक्रमित १ पुरुषको पनि मृत्यु भएको छ।
सर्लाही छकरघट्टा निवासी ३५ वर्षीय पुरुषको प्लाज्मा थेरापीबाट उपचाररत अवस्थामा आइतबार बिहान मृत्यु भएको अस्पतालका प्रवक्ता डा. अतुलेश चौरसियाले जानकारी दिए ।
यसैगरी विराटनगरको कोसी अस्पतालकाे कोभिड–१९ उपचार केन्द्रमा उपचाररत थप १ जना कोरोना संक्रमित वृद्ध पुरुषको सोमबार बिहान मृत्यु भएको छ ।
विराटनगर महानगरपालिका–१० का ७६ वर्षीय पुरुषको बिहान ३ः१५ बजेतिर मृत्यु भएको अस्पतालका मेसु डा. चुमनलाल दासले जानकारी दिए ।
उनका अनुसार भदौ ११ गने संक्रमण पुष्टि भएका वृद्धलाई १० दिन ‘होम आइसोलेसन’मा राखेर उपचारका लागि शनिबार उपचार केन्द्रमा ल्याइएको थियो ।
ती पुरुषमा उच्च रक्तचापको समस्या रहेको बताइएकाे छ ।
प्रकाशित मिति: सोमबार, भदौ २२, २०७७
-1732776560.jpg)
