काठमाडौं । केन्द्रीय कारागार सुन्धाराका थप ३५ कैदीबन्दीमा कोरोना भाइरसको संक्रमण पुष्टि भएको छ ।
राष्ट्रिय जनस्वास्थ्य प्रयोगशालामा गरिएको परीक्षणमा आइतबार ३५ जनामा कोरोना संक्रमण देखिएको जेलर लक्ष्मी बाँस्कोटाले बताए।
कोभिड क्राइसिस म्यानेजमेन्ट सेन्टर (सिसिएमसी)ले ३ दिनअघि स्वाब लिएर गएको थियो । बाँस्कोटाका अनुसार ६५ जनाको स्वाब लिइएकोमध्ये ३५ जनामा पोजेटिभ आएको हो ।
कारागारभित्र उपचाररत एक कैदीमा कोरोना संक्रमण पुष्टि भएपछि गरिएको परीक्षणमा थप ३५ जनामा संक्रमण पुष्टि भएको हो । योसहित केन्द्रीय कारागारका कैदीबन्दीहरुका कोरोना संक्रमितको संख्या ५० पुगेको छ ।
कारागारको ३ वटै ब्लकमा रहेको कैदीबन्दीमा संक्रमण देखिएको छ । यसअघिका संक्रमण पुष्टि भएका कैदीबन्दीलाई कीर्तिपुरको आइसोलेसेन सेन्टरमा पठाइएको थियो । आइतबार संक्रमण पुष्टि भएकामध्ये लक्षण देखिएकालाई अस्पताल र नदेखिएकालाई आइसोलेसन कक्षमा पठाउने तयारी भइरहेको कारागारले जनाएको छ ।
प्रकाशित मिति: आइतबार, भदौ १४, २०७७
-1732776560.jpg)
