काठमाडौं । भक्तपुरमा हाेम आइसाेलेसनमा बसेका १ काेराेना संक्रमितकाे मृत्यु भएकाे छ ।
भक्तपुर नगरपालिका–१ दूधपाटीका कोरोना संक्रमित ६५ वर्षीय पुरुषको होम आइसोलेसनमै मृत्यु भएको हाे ।
वडाध्यक्ष श्यामकृष्ण खत्रीका अनुसार वृद्धलाई कोरोना संक्रमण भएपछि होम आइसोलेसनमै राखिएको थियो ।
उच्च रक्तचाप र मधुमेहका बिरामी उनको भदौ ११ मा पिसीआर परीक्षण गरिएकोमा १२ गते शुक्रबार संक्रमण पुष्टि भएको थियो। होम आइसोलेसनमा बस्दै आएका उनको शनिबार राति मृत्यु भएको जिल्ला स्वास्थ्य कार्यालयका प्रमुख कृष्णबहादुर मिजारले बताए ।
कोरोना भाइरस पुष्टि भएपछि अस्पताल लैजान अनुरोध गर्दा परिवारले एक्लै खाना खान समस्या हुने भन्दै होम आइसोलेसनमा राखेका थिए ।
यसैगरी वीरगन्जमा पनि ४० वर्षीय कोरोना संक्रमित पुरुषको मृत्यु भएको छ।
रौतहटको राजपुर निवासी उनको आइतबार बिहान पौने ८ बजे गण्डक अस्पतालमा मृत्यु भएको नारायणी अस्पतालका प्रवक्ता डा. अतुलेश चौरसियाले जानकारी दिए।
उनलाई शुक्रबार अस्पताल भर्ना गरिएको थियो । मृतक पुरुषमा मधुमेह र निमोनियाको समेत समस्या रहेको डा. चौरसियाले जनाए ।
प्रकाशित मिति: आइतबार, भदौ १४, २०७७
-1732776560.jpg)
