काठमाडौं । रुसले युक्रेनको राजधानी किभ र आसपासका क्षेत्रमा रातभरि गरेको क्षेप्यास्त्र तथा ड्रोन आक्रमणमा कम्तीमा १२ जनाको मृत्यु भएको छ भने दर्जनौँ घाइते भएका छन्। मृतकमध्ये बालबालिका पनि छन्।
आक्रमणमा किभस्थित राष्ट्रिय रेल कम्पनी उक्रजालिज्नित्सियाको डिपोमा क्षति पुग्दा छ जना रेल कर्मचारीको मृत्यु भएको छ । किभका विभिन्न क्षेत्रमा आगलागी भएको छ । राजधानीनजिकैको बोरिस्पिलमा आवासीय भवनमा समेत क्षति पुगेको र त्यहाँ चार जनाको मृत्यु भएको अधिकारीहरूले बताएका छन् ।
युक्रेनी अधिकारीहरूका अनुसार आक्रमणमा क्रुज तथा ब्यालिस्टिक क्षेप्यास्त्रसँगै ठूलो संख्यामा ड्रोन प्रयोग गरिएको थियो । युक्रेनी वायुसेनाले धेरै क्षेप्यास्त्र तथा ड्रोन खसालेको जनाएको छ ।
रुसी सेनाले भने आक्रमणमा सैन्य–औद्योगिक तथा इन्धन–ऊर्जा पूर्वाधारलाई लक्षित गरिएको दाबी गरेको छ ।
यसैबीच, रुसको सीमावर्ती बेलगोरोड क्षेत्रमा युक्रेनी आक्रमणबाट एक जनाको मृत्यु भएको रुसी अधिकारीहरूले बताएका छन् । बाल्टिक सागरस्थित रुसको उस्त–लुगा बन्दरगाहमा पनि युक्रेनी ड्रोन आक्रमणपछि आगलागी भएको जनाइएको छ ।
उस्त–लुगा रुसको महत्वपूर्ण तेल तथा पेट्रोलियम निर्यात बन्दरगाहमध्ये एक हो । युक्रेनले रुसी युद्ध प्रयासमा आर्थिक योगदान गर्ने पूर्वाधारलाई लक्षित गरिएको बताउँदै आएको छ ।
प्रकाशित मिति: मंगलबार, भदौ १६, २०८३
-1787133994.jpg)
