काठमाडौं । नेपालमा शुक्रबारसम्म ७१ जना पत्रकारमा कोरोना संक्रमण पुष्टि भएको छ ।
सुदूरपश्चिमबाहेक बाँकी ६ प्रदेशका ७१ जना पत्रकारमा कोरोना संक्रमण पुष्टि भएको नेपाल पत्रकार महासंघले जनाएको छ।
प्रदेश नं १ मा १३ जना पत्रकार कोरोना संक्रमित भएका छन् । तीमध्ये मोरङका १२ र उदयपुरका १ जना छन् । त्यस्तै प्रदेश नं २ मा २७ जना पत्रकार संक्रमित भएका छन् । तीमध्ये पर्साका १३, बाराका ४, धनुषाका २, सप्तरीका ३, सर्लाहीका ३, महोत्तरीका १ र रौतहटका १ जना छन् ।
बागमती प्रदेशमा ११ जना पत्रकार संक्रमित भएका छन् । तीमध्ये काठमाडौँका ९ र ललितपुरका २ जना छन्। यसैगरी गण्डकी प्रदेशमा आठजना पत्रकार संक्रमित भएका छन् । तीमध्ये कास्कीका १ र नवलपुरका ७ जना छन् ।
प्रदेश नं ५ मा ११ जना पत्रकार संक्रमति भएका छन्। तीमध्ये बाँकेका २, बर्दियाका १, कपिलवस्तुका ६ र रुपन्देहीका २ जना छन् । त्यस्तै कर्णाली प्रदेशको दैलेखमा १ जना पत्रकार संक्रमित भएको महासंघका महासचिव रमेश विष्टले जानकारी दिए । उनले संक्रमितमध्ये केही निको भइसकेका छन् भने केही उपचाररत अवस्थामा रहेको जानकारी दिए।
कार्यस्थलमा गई खटिने पत्रकार, फोटो पत्रकार संक्रमणको उच्च जोखिममा छन्। महासंघले संक्रमणको उच्च जोखिमका बीच फिल्डमा खटिने सञ्चारकर्मीहरुको निःशुल्क पिसीआर परीक्षणको व्यवस्थाका साथै उपचाररत सबै पत्रकारहरुको उपचारको सहज व्यवस्था गर्न सरकारसँग माग गरेको उनको भनाइ छ।
महासंघले महामारीको विषम परिस्थितिमा आफ्नो पेशागत धर्म निर्वाहका क्रममा संवेदनशील भई पूर्वसतर्कताका सम्पूर्ण स्वास्थ्य सुरक्षाका उपायहरु अवलम्बन गर्दै स्वास्थ्य सुरक्षालाई उच्च प्राथमिकतामा राखेर मात्रै काम गर्न समेत अपील गरेको छ।
प्रकाशित मिति: शुक्रबार, भदौ १२, २०७७
-1732776560.jpg)
