काठमाडौं । सरकारले १२ वर्षमुनिका बालबालिका र ६० वर्षभन्दा माथिका जेष्ठ नागरिकलाई घर बाहिर ननिस्किन आग्रह गरेको छ ।
पछिल्लो समय कोरोना संक्रण दर बढ्दै गएको भन्दै सरकारले त्यसबाट बच्न बालबालिका र जेष्ठ नागरिकलाई घरबाहिर ननिस्किन आग्रह गरेको हो ।
आइतबार स्वास्थ्य मन्त्रालयको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले भने, '६० वर्षमाथिका जेष्ठ नागरिक र १२ वर्षमुनिका बालबालिका काठमाडौँ र यस्तै घना बस्ती भएका ठाउँमा घरबाहिर ननिस्किनुहुन अनुरोध छ ।’
यसैगरी उनले कोरोनाबाट बच्न नाक र मुख छोप्नेगरी मास्क लगाउने, मास्कलाई डोरीमा समाएर लगाउने र झिक्ने, कपडाको मास्क हरेक दिन धाेएपछि मात्र प्रयोग गर्ने, अल्कोहल भएको स्यानिटाइजर प्रयोग गर्ने, दूरी कायम गरेर बस्ने, जथाभावी नथुक्ने जस्ता उपाय अपनाउन पनि आग्रह गरे ।
यस्तै सरकारले कोरोना संक्रमित पत्ता लगाउनका लागि गरिने आरडिटी परीक्षण प्रयाेग नगर्न निर्देशन दिएकाे छ।
साउन १४ को मन्त्रिपरिषद्काे निर्णयअनुसार आरडिटी परीक्षण नगर्न सबै प्रदेश, स्थानीय तह र अस्पतालहरुलाई आग्रह गरिएको गौतमले जानकारी दिए ।
यस्तै कोरोना संक्रमणका कारण विभिन्न अस्पतालमा आकस्मिक सेवासहित अन्य सेवा प्रभावित भएको भन्दै उचित व्यवस्थापन गरी सेवा सञ्चालन गर्न समेत उनले आग्रह गरे ।
सरकारले कोरोना महामारी फैलिएको पर्साको वीरगन्जमा उच्चस्तरीय स्वास्थ्य टोली पठाएको पनि उनले जानकारी दिए । स्वास्थ्य सेवा विभागका महानिर्देशक डा.दीपेन्द्ररमण सिंहको नेतृत्वमा उच्चस्तरीय टोली पठाएर काम सुरु भएकाे उनले बताए ।
प्रकाशित मिति: आइतबार, साउन १८, २०७७
-1732776560.jpg)
